ထိုးစစ်အတွက်ရည်ရွယ်သည့် ကမ်ပိန်းပြုလုပ်နေပြီး ရန်ပုံငွေပြည့်မီရေးအား ဖြည့်ကူညီပေးရန်တောင်းဆို
ချင်းပြည်နယ် မင်းတပ်နှင့် မကွေးတိုင်း ပခုက္ကူမြို့အကြားရှိမြို့များအား ထိန်းချုပ်နိုင်ရေး အတွက် ထိုးစစ်ဆင်ရန် စတင်ပြင်ဆင်နေပြီး မဟာမိတ်များ ၊ အမျိုးသားညီညွတ်ရေးအစိုးရ(NUG)ကာကွယ်ရေးအောက်ရှိ တပ်ရင်းများဖြင့် ပူးပေါင်းဆောင်ရွက်မည်ဖြစ်ကြောင်း မင်းတပ် ချင်းကာကွယ်ရေးတပ်(CDF) စစ်ဒေသမှူး ဆလိုင်းနိုင်းတမ်က အသိပေးခဲ့ပြီး အဆိုပါ ထိုးစစ် အတွက် လိုအပ်သည့် ပစ္စည်းများ ဝယ်ယူနိုင်ရေး ပြုလုပ်လျက်ရှိသည့် အားယူထပျံ အောက်ချင်းအားမာန် ကမ်ပိန်းရန်ပုံငွေ ပြည့်မီရေး ပံ့ပိုးကူညီပေးရန် တောင်းဆိုလိုက်သည်။
အဆိုပါ ကမ်ပိန်းအတွက် ရန်ပုံငွေကျပ်သိန်း ၅,၀၀၀ရရှိရေး ဆောင်ရွက်နေပြီး ကမ်ပိန်းကာလကို မေလ ၁၉ရက်မှ ဇွန်လ ၁၉ရက်အထိ သတ်မှတ်ထားသည်။
လက်ရှိတွင် မင်းတပ်မြို့နယ်အတွင်း ၅ရက်ဆက် တိုက်ပွဲဖြစ်ပွားလျက်ရှိရာ ကျည်လိုအပ်ချက်များလည်းရှိနေသည်ဟု ဆိုသည်။
“အခု ၅ရက်ကြာလာတဲ့ တိုက်ပွဲမှာ ကျနော်တို့ သုံးနေတာ ကျည် ၂၀၀၀ လောက်ဖြစ်လာပြီ။ ကျည်လိုအပ်ချက်တွေရှိနေသလို ကျနော်တို့ရဲ့ သိန်း ၅,၀၀၀ Campaign ကလည်း ၁၀ ရာခိုင်နှုန်းတောင် မရသေးဘူး။အားဖြည့်ပေးဖို့ အကူအညီတောင်းလိုပါတယ်။”ဟု ဆလိုင်းနိုင်းတမ်က ပြောသည်။
Public Service Announcement
ယခုပြုလုပ်သည့် ကမ်ပိန်းသည် ထိုးစစ်အတွက် ပြင်ဆင်မှုတစ်ရပ်ဖြစ်သည်ဟုလည်း အသိပေးသည်။
“Campaign က ထိုးစစ်အတွက်လိုအပ်တဲ့ဟာလေးတွေ ဝယ်ဖို့ လုပ်တာပါ။ ကျနော်တို့ မင်းတပ် နဲ့ ပခုက္ကူကြားက မြို့တွေကို မဟာမိတ်တွေ ၊MOD အောက်တပ်ရင်းတွေနဲ့ ပူးပေါင်းပြီး အတက်နိုင်ဆုံး ထိန်းချုပ်ဖို့ ခြေလှမ်းစနေတာပါ” ဟု ဆလိုင်းနိုင်းတမ်က ပြောသည်။
မင်းတပ်နှင့်ကျောက်ထုအကြား တိုက်ပွဲ ၅ရက်တာအတွင်း စစ်ကောင်စီတပ်က ဒုတပ်ရင်းမှူး အပါအဝင် သေဆုံးထိခိုက်များပြားလျက်ရှိသည်ဟု CDF တာဝန်ရှိသူတို့က အသိပေးထားသည်။ အဆိုပါ တိုက်ပွဲများ၌လည်း မကွေးတိုင်းအတွင်းရှိ PDFများနှင့် CDF များ ပူးပေါင်း တိုက်ပွဲဝင်နေခြင်းဖြစ်သည်။
မင်းတပ် CDF၏ အားယူထပျံ အောက်ချင်းအားမာန် ကမ်ပိန်းကို ဦးဆောင်နေကြသည့် တော်လှန်ရေးခေါင်းဆောင်များအနေဖြင့် ကျဉ်းမြောင်းသည့် အမြင်မရှိဘဲ တောင်ပေါ်မြေပြန့် ကမ်းရိုးတမ်း မခွဲခြားဘဲ ပြိုင်တူ တသံတည်းညီ တချီတည်းရုန်းကြမည်ဟု စိတ်ထားရှိသည့်အတွက် များစွာ ဝမ်းသာကြောင်း ၈၈မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းခေါင်းဆောင် ဦးမင်းကိုနိုင်က ပြောသည်။
“ထောက်ပံ့မှုများကအစအပြန်အလှန် ကူကြရမှာပါ။ ကျနော်တို့က အချိန်ဆွဲမခံဘူး။ အာရုံလွှဲမခံဘူး။ စိတ်ဝမ်းကွဲမခံဘူးလို့ ကြွေးကြော်ထားတဲ့အတိုင်း တသံတည်းချီတချီတည်းရုန်း ကြပါစို့။ ပြည်သူတွေက ငါတို့ အလှည့်ရောက်ပြီဆိုတဲ့ ကြွေးကြော်သံမျိုးနဲ့ ဟောဒီတိုက်ပွဲကို အနိုင်တိုက်ကြပါစို့။ အဲဒါကြောင့် တစ်ယောက်နဲ့တစ်ယောက် အပြန်အလှန်ထောက်ကြကူကြ ဝန်းရံကြပါစို့”ဟု ဦးမင်းကိုနိုင်က ပြောသည်။
