ကော့ကရိတ်မြို့အနီး အာရှလမ်းမဘက်မှာ ဒီကနေ့မနက်ပိုင်းက ပစ်ခတ်တိုက်ခိုက်သံတွေ ကြားနေရတယ်လို့ ဒေသခံတစ်ဦးက ပြောပါတယ်။
အာရှလမ်းမပေါ်ရဲ့ ကော့ကရိတ် – ကျိုက်ဒုံသွား လမ်းဆုံဘက်မှာ ပစ်ခတ်တိုက်ခိုက်မှုတွေ ဖြစ်ပွားခဲ့တာလို့ ဒေသခံတစ်ဦးက ဆိုပါတယ်။
“လက်နက်ကြီး လက်နက်ငယ် အချက် ၂၀ ကျော်လောက်ကြားရတယ်။ အာရှလမ်းထိတ်မှာ ထင်တယ်။ အခုလည်းကြားရသေးတယ်” လို့ ဒေသခံတစ်ဦးက ပြောပါတယ်။
ကနဦးကြားသိရတဲ့ သတင်းအရ အဲ့ဒီပစ်ခတ်တိုက်ခိုက်တာတွေဟာ ခွဲထွက်ဒီကေဘီအေအဖွဲ့နဲ့ အာဏာသိမ်းအကြမ်းဖက်စစ်အုပ်စုတို့ကြား တိုက်ပွဲဖြစ်ပွားခဲ့တာလို့ ကြားသိရပါတယ်။
Public Service Announcement
အာရှလမ်းပေါ်မှာ အကြမ်းဖက်စစ်ကောင်စီတပ်ရင်းမှူးတစ်ဦး လိုက်ပါစီးနင်းလာတဲ့ ယာဉ်တန်းကို ဗိုလ်ကျော်သက်ဦးဆောင်တဲ့ ခွဲထွက်ဒီကေဘီအေတပ်ဖွဲ့က ကြားဖြတ်တိုက်ခိုက်ခဲ့တာလို့ မြေပြင်သတင်းရဲ့ ပေးပို့ချက်အရ သိရပါတယ်။
ပြီးခဲ့တဲ့ လပိုင်းက ကော့ကရိတ်မြို့ အနီး ကမိုင်ကုန်းဘက်မှာ ကရင်အမျိုးသားလွတ်မြောက်ရေးတပ်မတော် (KNLA)နဲ့ အကြမ်းဖက်စစ်ကောင်စီတို့ကြား တိုက်ပွဲဖြစ်ပွားခဲ့သေးတာ ဖြစ်ပါတယ်။
