ကရင်အမျိုးသားအစည်းအရုံး(KNU) မူတြော်(ဖာပွန်)ခရိုင် တပ်မဟာ(၅) နယ်မြေအတွင်းရှိ စစ်ကောင်စီ အုပ်ချုပ်ရေးယန္တရားလည်ပတ်နိုင်ရန် အထောက်အကူဖြစ်စေသည့် ဌာနဆိုင်ရာ ဝန်ထမ်းများ၊ ရပ်ကွက်၊ ကျေးရွာ အုပ်ချုပ်ရေးမှူးများ ရာထူးတာဝန်များမှ စွန့်လွှတ်၊ထွက်ခွာ နှုတ်ထွက်ခြင်းမပြုပါက ပို၍ထိရောက်စွာ အရေးယူမည်ဟု KNU တပ်မဟာ(၅)က ယနေ့ (ဩဂုတ် ၈ရက်) ထပ်မံ သတိပေးချက်ထုတ်ပြန်သည်။
တပ်မဟာ(၅)အနေဖြင့် စစ်ကောင်စီဝန်ထမ်းများ နှုတ်ထွက်ရန် ယခုနှစ် ဇန်နဝါရီ ၁ရက်ကလည်း ကြေညာချက် ထုတ်ပြန်သတိပေးထားသည်။ ၎င်းကြေညာချက်နှင့်ပတ်သက်၍ စစ်ကောင်စီ၏ ဌာနဆိုင်ရာ ဝန်ထမ်းနှင့် အုပ်ချုပ်ရေးမှူးအချို့ လိုက်နာဆောင်ရွက်မှုရှိခဲ့သော်လည်း အချို့ဝန်ထမ်းများ၊ အုပ်ချုပ်ရေးမှူးများက ယနေ့အချိန်ထိ လိုက်နာဆောင်ရွက်မှုမရှိသည့်အပြင် ထုတ်ပြန်ချက်ကို ဆန့်ကျင်ပြီး စစ်ကောင်စီ အကျိုးပြုစေသည့် လှုပ်ရှားမှုများ ဆက်လက်လုပ်ဆောင်နေဆဲဖြစ်သည်ကို တွေ့မြင်ရကြောင်း ဖော်ပြသည်။
ထို့ကြောင့် စစ်ကောင်စီ ၏ ကျန်ရှိနေသည့် ဌာနဆိုင်ရာ ဝန်ထမ်းများ ၊ အုပ်ချုပ်ရေးမှူးများအား တပ်မဟာ(၅)၏ ယခင်အမိန့်ထုတ်ပြန်ကြေညာချက်အတိုင်း အတိအလင်း လိုက်နာ ဆောင်ရွက်ရန် နှင့် မလိုက်နာသောသူအား အမိန့်အား ဆန့်ကျင်သူများအဖြစ် သတ်မှတ်ပြီး ယခင်ထက်ပိုပြီး ထိရောက်သည့် အရေးယူဆောင်ရွက်မှုများ ဆက်လက်ပြုလုပ်မည်ဖြစ်ကြောင်း ထပ်မံ သတိပေးခဲ့သည်။
မင်းအောင်လှိုင် ဦးဆောင်သည့် စစ်ကောင်စီသည် နိုင်ငံတော်အာဏာကို မတရားသိမ်းယူထားသည့် အကြမ်းဖက်စစ်အစိုးရ ဖြစ်သောကြောင့် ကရင်လူထုအပါအဝင် တစ်နိုင်ငံလုံးရှိ ပြည်သူလူထုများက ၎င်းတို့အား တရားဝင်လက်ခံ အသိအမှတ်ပြုခြင်းမရှိသည့်အပြင် လမ်းပေါ်ထွက် ဆန္ဒထုတ်ဖော်မှုများ၊ လက်နက်စွဲကိုင်တော်လှန်မှုများ လက်ရှိ အချိန်အထိ ဆက်လက်ဖြစ်ပေါ်နေဆဲဖြစ်ကြောင်း KNU တပ်မဟာ(၅)၏ ထုတ်ပြန်ချက်၌ ဖော်ပြထားသည်။
Public Service Announcement
KNU တပ်မဟာ(၅)နယ်မြေတွင် စစ်ကောင်စီတပ်များကို တိုက်ခိုက်မှုများလည်း နေ့စဉ်နီးပါးလုပ်ဆောင်လျက်ရှိရာ ပြီးခဲ့သည့် ဇူလိုင်အတွင်း တိုက်ပွဲပေါင်း ၁၈၉ ကြိမ် ရှိခဲ့ပြီး စစ်ကောင်စီတပ်မှ ၁၀၉ ဦးသေဆုံးကာ ၈၂ဦး ဒဏ်ရာရခဲ့ကြောင်း တပ်မဟာ(၅)က အသိပေးထားသည်။
