အပူပိုင်းမုန်တိုင်းငယ် Soulik သည် ထိုင်းနိုင်ငံတွင်အားလျော့ပျက်ပြယ်သွားပြီးဖြစ်သော်လည်းအမုတ်သုန်လေအားကောင်းနေ၍ မြန်မာနိုင်ငံဒေသအချို့ မိုးကြီးနိုင်သေးကြောင်းအမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က သတင်းထုတ်ပြန်သည်။
အပူပိုင်းမုန်တိုင်းငယ် Soulik သည် ယနေ့(စက်တင်ဘာလ ၂၀ရက်) နံနက်ပိုင်း၌ ထိုင်းနိုင်ငံ အရှေ့မြောက်ဘက်သို့ ဝင်ရောက်ခဲ့ပြီး နောက် ကုန်းတွင်းပိုင်းလေဖိအားနည်းရပ်ဝန်းအဖြစ်သို့ အားလျော့ပျက်ပြယ်သွားပြီဖြစ်သည်။မုန်တိုင်းငယ်၏ သက်ရောက်မှုကြောင့် မုတ်သုန်လေဖိအားနည်းမြှောင်တန်း အားကောင်းလာစေပြီး မြန်မာနိုင်ငံအတွင်း မိုးဆက်လက်ရွာသွန်းနိုင်ကြောင်း အသိပေးထားသည်။
စက်တက်ဘာလ ၂၁ ရက် နှင့် ၂၂ရက်၌ မြန်မာနိုင်ငံဒေသအများစု မိုးရွာနိုင်ပြီး ရှမ်းပြည်နယ်တောင်ပိုင်း၊ ကချင်ပြည်နယ်အလယ်ပိုင်းနှင့်တောင်ပိုင်း၊ မကွေးတိုင်းအောက်ပိုင်း၊ မန္တလေးတိုင်း နှင့် ပဲခူးတိုင်းတို့တွင် နေရာကွက်၍ မိုးကြီးခြင်းများဖြစ်ပေါ်နိုင်သည်ဟု သတိပေးထားသည်။
Public Service Announcement
အပူပိုင်းမုန်တိုင်းငယ် Soulik သည်စက်တင်ဘာလ ၁၉ရက်ညနေတွင် ဗီယက်နမ်နိုင်ငံ ကုန်းတွင်းပိုင်းကို တစ်နာရီ မိုင် ၄၀ခန့်ဖြင့် ဖြတ်ကျော်ဝင်ရောက်ပြီး ယနေ့နံနက်ပိုင်းတွင်လာအိုနိုင်ငံ၊ နှင့်ထိုင်းနိုင်ငံသို့ ဝင်ရောက်ခဲ့ပြီး မြန်မာနိုင်ငံမရောက်မီ အားလျော့ပျက်ပြယ်သွားခြင်းဖြစ်သည်။
မူလခန့်မှန်းချက်များတွင် အပူပိုင်းမုန်တိုင်းငယ် Soulik သက်ရောက်မှုကြောင့် မြန်မာနိူင်ငံ ဒေသအများအပြား မိုးကြီးနိုင်၍ ရေဘေးသတိပေးချက်များထုတ်ပြန်ခဲ့သည်။ ယခုမူ အားပျော့ပျက်ပြယ်ခြင်းနှင့်အတူ မိုးကြီးနိုင်သည့် ဒေသအရေအတွက်လည်း နည်းပါးသွားပြီဖြစ်သည်။
လက်ရှိတွင် မုတ်သုန် လေဖိအားနည်းမြှောင်တန်း အားကောင်းနေခြင်းကြောင့် မြန်မာနိုင်ငံနေရာဒေသ အများစုတွင် မိုးသည်းထန်စွာရွာသွန်းခြင်း၊ မြေနိမ့်ဒေသများတွင် ရေလွှမ်းမိုးခြင်းနှင့် တောင်ကုန်းတောင်တန်းများ၌ မြေပြိုခြင်းများ ဖြစ်ပွားနိုင်ပါသဖြင့် ဒေသခံပြည်သူများအနေဖြင့် မိုးရွာသွန်းမှုနှင့် ရေကြီးရေလျှံနိုင်မှုအန္တရာယ်များကို သတိပြုနေထိုင်ကြပါရန်လည်း MOHADMက သတိပေးထားသည်။
