အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဒေါ်ဇင်မာအောင် နှင့် စပိန်နိုင်ငံခြားရေးဝန်ကြီးဌာန ဒုတိယဝန်ကြီး H.E Cristina Gallach တို့သည် မြန်မာနိုင်ငံ အတွင်း လတ်တလောဖြစ်ပေါ်နေသည့် နိုင်ငံရေးအခြေအနေများနှင့်ပတ်သက်၍ ယနေ့ ဆွေးနွေးခဲ့ကြောင်း NUG က ထုတ်ပြန်သည်။
ထိုသို့ဆွေးနွေးရာတွင် စပိန်အစိုးရအပါအဝင် ဥရောပသမဂ္ဂအဖွဲ့ဝင်နိုင်ငံများ၏ စစ်ကောင်စီအား စီးပွါးရေးပိတ်ဆို့ဒဏ်ခတ် အရေးယူမှုဆိုင်ရာ အခြေအနေ ၊ NUG အား နိုင်ငံတကာမျက်နှာစာတွင် ထောက်ခံမှု ရရှိရေး အခြေအနေ များကို ဆွေးနွေးခဲ့ကြောင်း ထုတ်ပြန်ချက်၌ ဖော်ပြသည်။
စပိန်နိုင်ငံအနေဖြင့်လည်း မြန်မာနိုင်ငံအတွင်းဖြစ်ပေါ်လျက်ရှိသည် အာဏာသိမ်းမှု နှင့် နောက်ဆက်တွဲ အကြမ်းဖက်မှုများ ၊ မတည်မငြိမ်မှုများအတွက် စိုးရိမ်လျက်ရှိကြောင်း ဆွေးနွေးခဲ့သည်ဟု ဆိုသည်။
ထို့ပြင် မြန်မာပြည်သူများနှင့် ဒီမိုကရေစီပြန်လည် ဖေါ်ဆောင်ရေးအတွက် စပိန်နိုင်ငံအနေဖြင့် မြန်မာပြည်သူများ နှင့်အတူ ရပ်တည်ကြောင်း ဖော်ပြခဲ့ဟု ထုတ်ပြန်ခဲ့သည်။
အဆိုပါ ဆွေးနွေးပွဲတွင် စစ်ကောင်စီ ၏ အရပ်သားပြည်သူများနေထိုင်ရာ ကျေးရွာများ ၊ လူနေရပ်ကွက်များ အား အကြမ်းဖက် ဖျက်စီးမှုများ ၊ ဖမ်းစီးထိမ်းသိမ်းမှုများ ၊ လူ့အခွင့်အရေးချိုးဖေါက်မှုများကြောင့် လူသားခြင်းစာနာထောက်ထားမှုဆိုင်ရာအကူအညီလိုအပ်နေမှု အခြေအနေများကို ထည့်သွင်းဆွေးနွေးခဲ့ကြောင်း ထုတ်ပြန်ချက်၌ ဖော်ပြထားသည်။
နိုင်ငံတကာအသိုင်းအဝိုင်း မှ ပူးပေါင်းကူညီဆောင်ရွက်နိုင်မည့်အခြေအနေ များကိုလည်း ဆွေးနွေးခဲ့သည်ဟု ဆိုသည်။