ဖမ်းဆီးထိန်းသိမ်းခြင်းခံထားရသော နိုင်ငံရေးအကျဉ်း သားများကို COVID-19 ရောဂါ ကူးစက်ပြီး ထိခိုက်သေဆုံးစေရန် အကြမ်းဖက်စစ်ကောင်စီက ရည်ရွယ် ချက်ရှိရှိ လုပ်ဆောင်လျက်ရှိကြောင်း အမျိုးသားညီညွတ်ရေးအစိုးရ(NUG) အမျိုးသားအဆင့် COVID-19 ကာကွယ်၊ ထိန်းချုပ်၊ ကုသရေး ကော်မရှင် ၏ ယနေ့ ထုတ်ပြန်ချက်၌ ဖော်ပြထားသည်။
အကျဉ်းထောင်များတွင် COVID-19 ရောဂါ ကူးစက်ပြန့်ပွားသေဆုံးမှုများ ဖြစ်ပွားလျက်ရှိ သည့်ကိစ္စနှင့်ပတ်သက်၍ အကြမ်းဖက်စစ်ကောင်စီအား ပြင်းထန်စွာ သတိပေးကြောင်း အမိန့်ကြော်ငြာစာကို ကော်မရှင်က ထုတ်ပြန်ခဲ့ခြင်းဖြစ်သည်။
နိုင်ငံအကျဉ်းသားများအနေဖြင့် COVID-19 ရောဂါကူးစက်မှုကြောင့် ထိခိုက်သေဆုံးမှုများ မဖြစ်ပွားစေရန်နှင့် လုံလောက်သော ကျန်းမာရေးစောင့်ရှောက်မှုများ ခံယူရရှိနိုင်စေရန်၊ နိုင်ငံရေးအကျဉ်းသားအားလုံးကို ချွင်းချက်မရှိ ချက်ချင်း လွှတ်ပေးရန် သတိပေးကြောင်း ဖော်ပြခဲ့သည်။
သို့တည်းမဟုတ်ပါက ဖြစ်ပေါ်လာသော အကျိုးဆက်များအားလုံးကို အကြမ်းဖက် စစ်ကောင်စီက တာဝန်ယူရမည်ဖြစ်ပြီး လူမဆန်သောအဆိုပါလုပ်ရပ်များအတွက် ပြည်သူ့ဆန္ဒအရ တရား ဥပဒေနှင့်အညီ ပြင်းပြင်း ထန်ထန် အရေးယူဆောင်ရွက်သွားမည်ဖြစ်ကြောင်းလည်း သတိပေးခဲ့သည်။
Public Service Announcement
ယခုလက်ရှိ မြန်မာနိုင်ငံတွင် COVID-19 ရောဂါ ဖြစ်ပွား၊ သေဆုံးမှုများ ကြောက်ခမန်းလိလိ ဖြစ်ပွားလျက်ရှိကြောင်း၊ အကြမ်းဖက်စစ်ကောင်စီသည် လူသားချင်း စာနာထောက်ထားမှုမရှိဘဲ မိမိအာဏာတည်မြဲရေး ကိုသာရှေးရှု၍ ပြည်သူလူထုအားဖိနှိပ်ရာတွင် COVID-19 ရောဂါကို လက်နက်သဖွယ် အသုံးချလျက်ရှိသည်ကို တွေ့မြင်နေရကြောင်း ထုတ်ပြန်ချက်၌ပါရှိသည်။
ထို့အပြင် လူ့အခွင့်အရေးတစ်ရပ်ဖြစ်သော လူတိုင်း လွတ်လပ်စွာ ဆေးကုသ ပိုင်ခွင့်ကို နည်းမျိုးစုံဖြင့် ပိတ်ပင်တားဆီးလျက်ရှိနေသည်ကို သက်သေသာဓက အမြောက်အမြားနှင့်တကွ တွေ့ရှိနေရကြောင်း၊ ယခုအချိန်အခါတွင် ပြည်သူလူထုသည် “ပြေးစရာ မြေမရှိ” ဆိုသကဲ့သို့ စိတ်ဓာတ် လုံခြုံမှု မရှိဘဲ နေ့စဉ်နှင့်အမျှ စိတ်ရောကိုယ်ပါ ပင်ပန်းဆင်းရဲကြီးစွာ ခံစားနေရသည်ကိုလည်း ကြားသိနေရသည်ဟု NUGက ထုတ်ပြန်ခဲ့သည်။
