ကုလသမဂ္ဂလုံခြုံရေးကောင်စီဟာ မြန်မာ့အရေးနဲ့ပတ်သက်ပြီး ဒီနေ့ဆွေးနွေးဖို့ရှိနေပြီး ကုလသမဂ္ဂက ကိုင်တွယ်တုံ့ပြန်ရေးအတွက်အထွေထွေအတွင်းရေးမှူး ချုပ် အန်တိုနီယိုဂူတာရက်စ် ကိုယ်တိုင်ဦးဆောင်ဖို့ Burma Campaign UKက တောင်းဆိုလိုက်ပါတယ်။
ကုလလုံခြုံရေးကောင်စီဟာ ကိုဗစ်ကပ်ရောဂါတတိယလှိုင်းအကျပ်အတည်းနဲ့ကြုံတွေ့နေရတဲ့ မြန်မာ့အရေးကို ဆွေးနွေးမှာဖြစ်ပြီး မြန်မာနိုင်ငံဟာ အကြမ်းဖက်စစ်တပ်ရဲ့ ညံ့ဖျင်းမှုနဲ့ နိုင်ငံကို အုပ်ချုပ်နိုင် ရေးအတွက် ကိုဗစ်ကို လက်နက်သဖွယ်အသုံးချနေမှုနှစ်ခုစလုံးကြောင့် ပိုမိုဆိုးရွား လာနေတာလည်းဖြစ်ပါတယ်။
“အရေးယူဆောင်ရွက်ဖို့ ရုရှားနဲ့ တရုတ်က လုံခြုံရေးကောင်စီမှာ ပိတ်ဆို့ထားမှုနဲ့အတူ ကုလအထူးကိုယ်စားလှယ်ကိုလည်း စစ်တပ်က လျစ်လျူရှုထားပါတယ်။ နောက်ပြီး အာဆီယံရဲ့ကြား ဝင်ဖြေရှင်းမှုက သိသာထင်ရှားတဲ့ အကျိုးသက်ရောက်မှုရှိလာလိမ့်မယ်လို့ ဘယ်သူကမျှ မယုံ ကြည်ပါဘူး။ အရေးယူဆောင်ရွက်ဖို့ ကုလအထွေထွေအတွင်းရေးမှူးချုပ်ရဲ့ ကိုယ်တိုင် ဦးဆောင်မှုကသာ တစ်ခုတည်းသော အကောင်းဆုံးနည်းလမ်းပါ”လို့ Burma Campaign UK ရဲ့ အမှု ဆောင်ဒါရိုက်တာ Anna Roberts က ပြောပါတယ်။
ကုလအထူးကိုယ်စားလှယ်ကို စေလွှတ်တာထက် အထွေထွေအတွင်းရေးမှူးချုပ်ကိုယ်တိုင် မြန်မာပြည်ကို သွားရောက်တာက စစ်တပ်အတွက် လျစ်လျူရှုဖို့ခက်ခဲတဲ့တောင်းဆိုမှုဖြစ် လိမ့် မယ်လို့ Burma Campaign UK က ထောက်ပြပါတယ်။
Public Service Announcement
ကုလအထွေထွေအတွင်းရေးမှူးချုပ်ရဲ့ အထူးကိုယ်စား လှယ်ခရစ္စတင်းရှယန်နာဘာဂျီနာဟာ အာဏာသိမ်းတဲ့ဖေဖော်ဝါရီ ၁ ရက်နောက်ပိုင်းကတည်းက မြန်မာပြည်လာရောက်ဖို့ အကြိမ်ကြိမ် တောင်းဆိုခဲ့ပေမယ့် အကြမ်းဖက်မြန်မာစစ်တပ်က ပြည်ဝင်ခွင့်မပေးသေးပါဘူး။
ဒါကြောင့် အတွင်းရေးမှူးချုပ် အန်တိုနီယိုဂူတာရက်စ်အနေနဲ့ သူ့ရဲ့ကြိုးပမ်းအားထုတ်မှုမှာ ကမ္ဘာ့ခေါင်းဆောင်တွေရဲ့ထောက်ခံမှုနဲ့အတူကိုယ်တိုင် ပြောဆိုနိုင်လိမ့်မယ်လို့ Burma Campaign UK က သုံးသပ်ပါတယ်။
“ကုလသမဂ္ဂက အစည်းအဝေးတွေ ကျင်းပနေတာ၊ ထုတ်ပြန်ချက်တွေ ထုတ်ပြန်နေတာတွေကို မြန်မာနိုင်ငံက မလိုအပ်ပါဘူး။ မြန်မာလိုအပ်နေတာ လက်တွေ့ကျတဲ့အရေးယူဆောင်ရွက်မှုပါ” လို့ Anna Roberts က ဆိုပါတယ်။
“အန်တိုနီယိုဂူတာရက်စ်အနေနဲ့ လေယာဉ်ပေါ်တက်ပြီး မြန်မာနိုင်ငံသွားရမယ့် အချိန်ရောက်နေ ပါပြီ။ လူသားချင်းစာနာမှုနဲ့ လူ့အခွင့်အရေးအကျပ်အတည်းတွေကို ဖြေရှင်းဖို့ သူ့ရုံးအဖွဲ့ကို စတင်သင့်ပါပြီ” လို့ သူက ဆက်ပြောပါတယ်။
ပြီးခဲ့တဲ့ ဇူလိုင် ၂၃ ရက်တုန်းက မြန်မာနိုင်ငံမှာရှိတဲ့ အရပ်ဘက်အဖွဲ့အစည်း ၄၄၃ ခုဟာ စစ်တပ်ရဲ့ ပြည်သူ လူထုအပေါ် စစ်ပြုနေခြင်းကို ရပ်တန့်ဖို့အပါအဝင် ကိုဗစ်-၁၉ ကပ်ရောဂါရင်ဆိုင်နေ ရတဲ့ မြန်မာ့အရေးကို ကုလသမဂ္ဂကကိုင်တွယ်ဖြေရှင်းရေးအတွက် အထွေထွေအတွင်းရေးမှူးချုပ်ကိုယ်တိုင် ဦးဆောင်ဖို့ စာရေးသားတောင်းဆိုထားပါတယ်။
