မိုးကုတ်မြို့ ၊အောင်သစ်လွင်ရပ်ကွက်မှာ ဒီနေ့မနက်အစောပိုင်းက မြေပြို မှုကြောင့် လူ ၁၀ ဦးထက်မနည်း ပိတ်မိနေကာ ကလေး ၂ ဦးအပါအဝင် ရုပ်အလောင်း ၃ လောင်းကိုရှာဖွေတွေ့ရှိထားတယ်လို့ လူမှုကူညီရေးအသင်းတွေဆီကသိရပါတယ်။
ဒီမြေပြိုမှုမှာ ပိတ်မိနေသူ ၁၀ ဦးမထက်နည်းရှိတယ်လို့ မြန်မာနိုင်ငံ လူမှုကယ်ဆယ်ရေးအဖွဲ့ (မိုးကုတ်မြို့နယ်)ရုံး သတင်းနဲ့ပြန်ကြားရေးက ကိုဟိန်းထက်မောင်ကပြောပါတယ်။
မြေပြိုမှုကြီးမားတဲ့အတွက် လူမှုကူညီရေးအသင်းတွေ ၊မီးသတ်တပ်ဖွဲ့တွေ နဲ့ ပိတ်မိနေသူတွေကို ဆက်လက်ရှာဖွေနေဆဲလို့ ဆိုပါတယ်။
သေဆုံးသွားသူတွေ ၃ ဦးဟာအမျိုးသမီးတွေဖြစ်တယ်လို့ မြန်မာနိုင်ငံမီးသတ်တပ်ဖွဲ့က ထုတ်ပြန်ထားပါတယ်။
ဒီနေ့မနက် ၇ နာရီ မထိုးခင်လောက်က နေအိမ်တွေအပေါ် တောင်ကမ်းပါးယံပြိုကျခဲ့တာဖြစ်ပြီး နေအိမ် ၃ လုံးလောက်ပျက်စီးသွားခဲ့တာပါ။
ပြီးခဲ့တဲ့ ရက်ပိုင်း သြဂုတ် ၁၂ နဲ့ သြဂုတ် ၁၃ ရက်တွေ က မိုးကုတ်မြို့မှာ မြေပြိုမှု နှစ်ကြိမ် ဆက်တိုက်ဖြစ်ခဲ့ပြီးကလေး ၁ ဦးအပါအဝင် ၄ ဦးသေဆုံးခဲ့တာရှိပါတယ်။
မြေပြိုမှုအန္တရာယ်ရှိတာကြောင့် တောင်ကုန်းတွေနားနေထိုင်သူတွေကို လူမှုကူညီရေးအသင်းတွေက သတိပေးထားတာရှိပါတယ်။