စက်တင်ဘာမှာကျင်းပမယ့် ကုလသမဂ္ဂအထွေထွေညီလာခံကို အကြမ်းဖက်စစ်ကောင်စီက တက်ရောက်ဖို့ ကြိုးစားနေပေမယ့် စစ်ကောင်စီက ကိုယ်စားပြုခွင့်လုံး၀မရရှိမှာမဟုတ်ဘူးလို့ အမျိုးသားညီညွတ်ရေးအစိုးရ(NUG)က ပြောပါတယ်။
ဒီနေ့ကျင်းပတဲ့ NUG ရဲ့ စတုတ္ထအကြိမ်မြောက်သတင်းစာရှင်းလင်းပွဲမှာ နိုင်ငံခြားရေးဒုတိယဝန် ကြီး ဦးမိုးဇော်ဦးက မြန်မာနိုင်ငံကိုယ်စားပြုမှုရရှိဖို့ NUG က ကြိုးစားနေပြီး သေချာတာကတော့ စစ်ကောင်စီက နိုင်ငံကိုယ်စားပြုခွင့်လုံး၀ရရှိမှာမဟုတ်ဘူးလို့ ပြောကြားခဲ့တာပါ။
“စစ်ကောင်စီကို တရားဝင်အသိအမှတ်ပြုပြီး ကုလ သမဂ္ဂအထွေထွေညီလာခံမှာ တရားဝင်ကိုယ်စားပြုမှုကို ထောက်ခံ မယ်ဆိုတဲ့နိုင်ငံဟာ ကျွန်တော်သိသလောက် လက်ငါးချောင်းချိုးလို့ မပြည့်ပါဘူး။ ဒါပေမဲ့ စစ်ကောင်စီရဲ့ ကိုယ်စားပြုမှုကို ကုလသမဂ္ဂ ညီလာခံမှာ လက်မခံတဲ့နိုင်ငံတွေကတော့ တစ်ကမ္ဘာလုံးပါပဲ။ ဒါ ကျွန်တော်ရဲရဲကြီးပြောရဲပါတယ်။ တစ်ကမ္ဘာလုံးပါပဲ။ ဒီကိစ္စ နဲ့ပတ်သက်လို့ စစ်ကောင်စီ အနေနဲ့ ဘယ်လောက်ကြိုးစားကြိုးစား သူတို့အနေနဲ့ ကုလသမဂ္ဂအထွေထွေညီလာခံမှာ သူတို့ရဲ့ ကိုယ်စားပြုမှု ရရှိမှာမဟုတ်ဘူးဆိုတာကိုတော့ ဒါ အတပ်ပြောရဲပါတယ်” လို့ ဒုတိယဝန်ကြီး ဦးမိုးဇော်ဦးက ပြောပါတယ်။
လာမယ့် ကုလသမဂ္ဂအထွေထွေညီလာခံမှာ အကြမ်းဖက်စစ်ကောင်စီ ကိုယ်စားပြုခွင့်လုံး၀မရရှိ ရေးဟာ NUG ရဲ့ အဓိက ရည်ရွယ်ကြိုးပမ်းချက်ဖြစ်ပြီး အဲဒီအတွက်လည်း နိုင်ငံတကာဥပဒေပညာရှင်တွေနဲ့ ဆွေးနွေးဆောင်ရွက်နေတယ်လို့ ဆိုပါတယ်။
Public Service Announcement
အာဏာသိမ်းတာ ၇ လနီးပါးရှိလာချိန်အထိ အကြမ်းစစ်ကောင်စီကို ကုလသမဂ္ဂက အသိအမှတ်ပြုခြင်းမရှိသေးဘဲ အရပ်သားအစိုးရခန့်အပ်ခဲ့တဲ့၊ မြန်မာပြည်သူတွေနဲ့ တစ်သားတည်းရပ်တည်နေတဲ့ သံအမတ်ကြီး ဦးကျော်မိုးထွန်းကို ဆက်လက်လက်ခံအသိအမှတ်ပြုထားပါတယ်။
