မကွေးတိုင်း ပေါက်မြို့နယ် ကင်းမကျေးရွာတွင် မိုင်းထိ၍ စစ်ကောင်စီတပ်ဖွဲ့ဝင်နှစ်ဦး သေဆုံးသွားကြောင်း ဒေသခံများက ပြောသည်။
သြဂုတ် ၂၈ ရက်ည ၁၀ နာရီခန့်က စစ်ကောင်စီတပ်ဖွဲ့ဝင်များသည် ကင်းမကျေးရွာအတွင်းသို့ လှည့်လည်ဝင်ရောက်လာရာ မိုင်းနင်းမိရာမှ ပေါက်ကွဲ့ခဲ့ခြင်းဖြစ်ပြီး စစ်သားတစ်ဦး ရဲသားတစ်ဦး သေဆုံးခဲ့ကြောင်း၊ အခြားစစ်သားတစ်ဦးလည်း မိုင်းစထိမှန်ကာ မျက်စိထိခိုက်သွားကြောင်း ဒေသခံများက ပြောသည်။
အဆိုပါ ထိခိုက်သွားသူများအနက် စစ်သားနှစ်ဦးသည် မုံရွာမြို့ကဖြစ်ပြီး ရဲတပ်သားမှာ မြိုင်မြို့နယ်ဖြစ်ကြောင်း၊ ရုပ်အလောင်းများကို ၎င်းတို့၏နယ်သို့ ပြန်ပို့ခဲ့ကြောင်း ဒေသခံများက ပြောသည်။
ကင်းမကျေးရွာတွင် ဇွန်လ ၁၆ ရက် နံနက်ပိုင်းက စစ်ကောင်စီတပ်များဝင်ရောက်လာပြီးနောက် မီးလောင်ကျွမ်းမှုဖြစ်ပွားခဲ့ပြီး အိမ်ခြေ ၃၀၀ ခန့် ရွာလုံးကျွတ်နီးပါး မီးလောင်ပျက်စီးခဲ့ကာ သက်ကြီးရွယ်အို လေးဦး မီးလောင်သေဆုံးခဲ့သည်။