ဖာပွန်မြို့မှာ ညတုန်းက ပစ်ခတ်သံတွေကြားနေရပြီး လက်နက်ကြီးကျည်တစ်လုံး ဆေးရုံကိုထိမှန်သွားခဲ့လို့ ကိုဗစ်လူနာတစ်ဦး ဒဏ်ရာအနည်းငယ်ရရှိသွားခဲ့တယ်လို့ သတင်းရရှိပါတယ်။
စက်တင်ဘာ ၅ ရက် ည ၈ နာရီခွဲအချိန်ခန့်က ဖာပွန်မြို့ အနောက်ဘက်ကမ်းမှာ ပစ်ခတ်သံတွေဖြစ်ပေါ်နေပြီး စစ်ကောင်စီတပ်နဲ့ KNU တပ်မဟာ ၅ တို့ကြား ပစ်ခတ်နေကြတာလို့ ဒေသခံတွေက ဆိုကြပါတယ်။
ဒီလိုပစ်ခတ်တာတွေ ဖြစ်နေတဲ့အချိန်မှာ ဖာပွန်မြို့မဆေးရုံ၀င်းထဲကို လက်နက်ကြီးကျည်ကျရောက်ခဲ့ပြီး ကိုဗစ်လူနာတွေထားရှိတဲ့ အဆောင်နားက အိမ်သာကို ထိမှန်သွားခဲ့တယ်လို့ မြို့ခံတွေက ဆိုကြပါတယ်။
လက်နက်ကြီးကျည်အစထိမှန်သွားခဲ့လို့ ဆေးရုံထဲမှာရှိတဲ့ ကိုဗစ်လူနာအမျိုးသမီးတစ်ဦး ဒဏ်ရာအနည်းငယ်ရရှိသွားခဲ့တယ်လို့ မြို့ခံတစ်ဦးက ပြောပါတယ်။
ဖာပွန်မြို့ပေါ်မှာ ဆေးရုံနဲ့ ဘုန်းကြီးကျောင်းတွေမှာ အကြမ်းဖက်စစ်ကောင်စီတပ်တွေက နေရာယူတပ်စွဲထားပြီး ဆေးရုံနားမှာရှိတဲ့ တပ်ဘက်က ပစ်လိုက်လို့ ဆေးရုံကိုသွားရောက်ထိမှန်သွားခဲ့တာလို့ ဒေသခံတွေက ဆိုကြပါတယ်။
ဖာပွန်မြို့မှာ လက်နက်ကြီးလက်နက်ငယ် ပစ်ခတ်သံတွေ မကြာခဏကြားနေရပြီး စစ်ကောင်စီတပ်တွေကတော့ လက်နက်ကြီးနဲ့ ရမ်းကားပစ်ခတ်တာမျိုးတွေ အမြဲတစေလုပ်ဆောင်တတ်တယ်လို့ ဒေသခံတွေရဲ့ ပြောကြားချက်အရ သိရပါတယ်။