အာဏာသိမ်းစစ်ကောင်စီကို ပြည်သူများ၏ ခုခံတော်လှန်စစ် စတင်ပြီဖြစ်ကြောင်း အမျိုးသားညီညွတ်ရေးအစိုးရ (NUG) ယာယီသမ္မတဒူဝါလရှီးလက ကြေညာပြီးနောက် စက်တင်ဘာ ၇ရက်တွင် ကယား၊ ချင်း၊ ရှမ်းပြည်နယ်၊ စစ်ကိုင်တိုင်းနှင့် တနသ်ာရီတိုင်းတို့တွင် တိုက်ပွဲများဖြစ်ပွားခဲ့သည်။
ထိုအပြင် နိုင်ငံတစ်ဝန်းတွင် စစ်ကောင်စီတပ်များ ၊ Metel တာဝါတိုင်များ၊ ဒလန်ကိုပစ်မှတ်ထား၍ တိုက် ခိုက်မှုများများစွာလည်းဖြစ်ပေါ်နေသည်။
● တနင်္သာရီတိုင်း မှတိုက်ပွဲများ
တနင်္သာရီတိုင်း ပုလောမြို့နယ်ရှိ KNU တပ်မဟာ ၄ နယ်မြေတွင် ယနေ့နံနက်က စစ်ကောင်စီတပ်များ အင်အားအလုံးအရင်းဖြင့် ဝင်ရောက်နေရာယူလာသဖြင့် နယ်မြေခံ ကရင်အမျိုးသားလွတ်မြောက်ရေးတပ်မတော် ( KNLA)တပ်မဟာ ၄၊ ကရင်အမျိုးသားကာကွယ်ရေးတပ်ဖွဲ့( KNDO) တပ်ရင်း ၇ တို့နှင့် တိုက်ပွဲပြင်းထန်စွာ ဖြစ်ပွားနေသည်။ပုလောမြို့နှင့် ၆ မိုင်အကွာရှိ ပိန္နဲတောင်ရွာနှင့် ဒူးရင်းပင် ချောင်ရွာ အနီးတဝိုက်ကို စစ်ကောင်စီတပ်ဖွဲ့ဝင် အင်အား ၁၅၀ က စစ်ကြောင်း ၂ ကြောင်းခွဲကာ ချီတက်လာသဖြင့် KNU ၏ တပ်မဟာ ၄ နှင့် တိုက်ပွဲဖြစ်ပွားခြင်းဖြစ်သည်။
စစ်ကောင်စီတပ်မှ အထိ့နာလိုက် ပြန်ဆုတ်လိုက် ၊လူစုပြီး ပြန်တက်လာလိုက်ဖြင့် ၄ ကြိမ်တိုက်ပွဲဖြစ်ရာ စစ်ကောင်စီတပ်မှအရာရှိအပါအဝင် ၄ ဦးသေဆုံးပြီး ၊ဒဏ်ရာရရှိသူများစွာရှိခဲ့ကြောင်း သိရသည်။
ထို့အပြင် တနသာ်ရီတိုင်း သရက်ချောင်းမြို့နယ်၊ တောင်ပြောက်တိုက်နယ်တွင်လည်း စက်တင်ဘာ ၇ ရက်ညတွင်တစ်နာရီနီးပါး ကြာ တိုက်ပွဲဖြစ်ပွားခဲ့သည်။
ယမန်နေ့ညည ၇ နာရီ ၅ မိနစ်ဝန်းကျင်မှစ၍ ရှစ်နာရီထိုးခါနီးအထိ စစ်ကောင်စီတပ်နှင့် ဒေသခံ ပြည်သူ့ကာကွယ်ရေးတပ် တို့ကြားတိုက်ပွဲဖြစ်ပွားခြင်းဖြစ်ကြောင်း ဒေသတွင်းသတင်းဌာနဖြစ်သော Dakkhina Insightသတင်းဌာနကဖော်ပြသည်။
● ကချင်နှင့်စစ်ကိုင်းအစပ်တိုက်ပွဲ နှင့် ကလေး မြို့နယ်မှတိုက်ပွဲ
ကချင်ပြည်နယ်နှင့်စစ်ကိုင်းတိုင်းအစပ်ရှိ ဟုမ္မလင်းမြို့နယ်ရှိ နမ့်သာ ဒေသတွင် ယမန်နေ့ နံနက် ၁၀နာရီမှစ၍ အကြမ်းဖက်စစ်ကောင်စီတပ်စခန်းကို ကချင်လက်နက်ကိုင်အဖွဲ့(KIA)က ယနေ့ မနက်တွင် ဝင်ရောက်တိုက်ခိုက်နေပြီး တိုက်ပွဲ ပြင်းထန်လျက်ရှိသည်။ တိုက်ပွဲတွင် ထိခိုက်ကျဆုံးမှု အခြေအနေကိုမူ မသိရသေးပေ ။
ထို့အပြင်စစ်ကိုင်းတိုင်း ကလေးမြို့နယ် တောင်ပိုင်း ကျောက်ဖူးရွာနှင့် ဒိုးနွယ်ရွာကြားတွင် အကြမ်းဖက်စစ်ကောင်စီတပ်စစ်ကြောင်းကို PDF Kalay တပ်ဖွဲ့က စက်တင်ဘာ၇ ရက် နေ့လည် ၁၂ နာရီဝန်းကျင်က မိုင်းဆွဲတိုက်ခိုက်ရာ အကြမ်းဖက် စကစတပ်သား အနည်းဆုံး ၄ ဦးသေဆုံးပြီး ၁၀ ဦးကျော်ဒဏ်ရာရရှိကြောင်း People’s Defence Force (Kalay) ကထုတ်ပြန်သည်။
● ကယားပြည်နယ်မှတိုက်ပွဲ
ကယားပြည်နယ် လွိုင်ကော်နှင့်ဒီမော့ဆိုမြို့နယ် အကြား ဒေါပိုးစီကျေးရွာ အနီး တွင်လာရောက်တပ်စွဲသော စစ်ကောင်စီတပ်များကို ယမန်နေ့မွန်းလွဲ ၃ နာရီတွင် ကရင်နီအမျိုးသားကာကွယ်ရေးတပ်ဖွဲ့(KNDF) တပ်ရင်းများကတိုက်ခိုက်ခဲ့ကြောင်း KNDFက သတင်းထုတ်ပြန် သည်။ အလားတူဒီမော့ဆို မြိုနယ်တွင်လည်း တိုက်ပွဲဖြစ်ပွားခဲ့သည်။ တိုက်ပွဲ နှစ်ကြိမ်ဖြစ်ပွားရာ စစ်ကောင်စီတပ်မှ ၄ ဦးသေဆုံးခဲ့ကြောင်းလည်း KNDF ကထုတ်ပြန်သည်။
ထို့အပြင် စစ်ကောင်စီ၏ ဒီမော့ဆိုရဲစခန်းကို ကရင်နီတပ်မတော်၊ KNDF နှင့် မဟာမိတ်PDF များပူးပေါင်း၍ ယမန်နေ့ည ၇နာရီအချိန်တွင် ဝင်ရောက်တိုက်ခိုက်ခဲ့သည်။ ရဲစခန်းတိုက်ပွဲတွင် နှစ်ဖက်ထိခိုက်ကျဆုံးမှုအခြေအနေကို မူမသိရသေးပေ ။
● ချင်းပြည်နယ်မှတိုက်ပွဲ
ချင်းပြည်နယ်ဟားခါးမြို့တတွင် ယနေ့ည ၉နာရီဝန်းကျင်မှစတင်ပြီးစစ်ကောင်စီတပ်များနှင့် CDFအဖွဲ့တို့ကြား တိုက်ပွဲဖြစ်ပွားခဲ့သည်။ ဟားခါးမြို့ပေါ်ချင်းဦးစီးရပ်ကွက် ပြည်နယ်အစိုးရအဖွဲ့ရုံးအနီးတဝှက်၊ရုန်းတောင်အနားတဝိုက်နှင့်ကျောဘုတ်ဘက်အနီးအနားတွင်ဖြစ်ပွားခဲ့ခြင်းဖြစ်ပြီး နှစ်ဖက်ထိခိုက်ကျဆုံးမှု အခြေအနေကိုမူမသိရသေးပေ ။
ထို့အပြင် ကန်ပက်လက်မြို့ ရဲစခန်းအနီးတွင်လည်း ယမန်နေ့ည ၁ဝနာရီ ၁၀ မိနစ်မှ ၁၀ နာရီ ၂၀ အိနစ် ကြား သေနတ်နဲ့ တူမီးသေနတ်သံ အချက် ၅၀ လောက်ရယ် ၊ လက်နက်ကြီးသံတစ်ချက်ရယ် ကြားရကြောင်း ဒေသခံများအားကိုးကား၍ ဒေသတွင်းသတင်း ဌာနဖြစ်သော
Zalen က ဖော်ပြသည်။
● မုံးကိုးဒေသ တိုက်ပွဲ
ရှမ်းပြည်နယ်မြောက်ပိုင်း မုံကိုးမြို့နယ်နှင့် ရှစ်မိုင်ခန့်အကွာတွင် စက်တင်ဘာ၇ ရက် နံနက် ၁၁ နာရီခွဲခန့်အချိန်ခန့်က စစ်ကောင်စီတပ်ဖွဲ့ဝင်များနှင့် ကိုးကန့် (MNDAA) တပ်တို့အကြားတိုက်ပွဲဖြစ်ပွားခဲ့သည်။ တိုက်ပွဲ ဖြစ်ပွားချိန် ၁၀ မိနစ်ဝန်းကျင် ကြာပြီး နှစ်ဖက် ကျဆုံး ဒဏ်ရာရရှိသူစာရင်းကိုမူမသိရှိရသေးပေ ။
အထက်ပါတိုက်ပွဲသတင်းများကို ဒေသခံများ၊ သက်ဆိုင်ရာအဖွဲ့အစည်းများနှင့် ဒေသတွင်းသတင်းဌာနများက အတည်ပြုထုတ်ပြန်ထားသော သတင်းများကိုစိစစ်ဖော်ပြထားခြင်းဖြစ်ပါသည်။
အလားတူ ရန်ကုန် ၊မန္တလေး ၊ကလေး စသော မြို့များအပါအဝင် နိုင်တစ်ဝန်းတွင် စစ်ကောင်စီတပ်များကို ပစ်မှတ်ထား ဗုံခွဲတိုက်ခိုက်မှုများ ၊ဒလန်များကို ရှင်းလင်းမှုများလည်း တော်လှန်ရေးတပ်ဖွဲ့များက ပြုလုပ်ခဲ့သည်။ စစ်ကိုင်းတိုင်းနှင့် ဒေသအများစုတွင် Mytel တာဝါတိုင်များစွာကို တော်လှန်ရေးတပ်ဖွဲ့များက မိုင်းခွဲ ဖျက်ဆီးခဲ့သည်။