ကုလသမဂ္ဂမျက်နှာစာမှာ အကြမ်းဖက်စစ်ကောင်စီရဲ့ ကိုယ်စားလှယ်မရှိရဘူးဆိုတာ ပြတ်ပြတ်သားသားပြောလို့ ရကြောင်း လက်ရှိမြန်မာသံအမတ်ကြီး ဦးကျော်မိုးထွန်းက ပြောကြားလိုက်ပါတယ်။
မနေ့က နယူးယောက်ရှိ ကုလသမဂ္ဂဌာနချုပ်ရုံးရှေ့မှာ အမေရိကန်ရောက်မြန်မာတွေ ထောင်နဲ့ချီစုဝေးခဲ့ပြီး သံ အမတ်ကြီးဦးကျော်မိုးထွန်းကို ဆက်လက်ခန့်ထားရေး၊ အမျိုးသားညီညွတ်ရေးအစိုးရကို ထောက်ခံကြောင်းနဲ့ စစ် အာဏာသိမ်းမှုကို လက်မခံကြောင်း ဆန္ဒထုတ်ဖော်ခဲ့ရာမှာ ဦးကျော်မိုးထွန်းက အခုလိုပြောခဲ့တာပါ။
“ဒီလိုလာတဲ့နေရာမှာ Credential ကိစ္စနဲ့လာတဲ့အတွက်ကြောင့် ပြည်သူ့အင်အားနဲ့ အောင်မြင်ရပါမယ်ခင်ဗျာ။ သေ ချာ တာတစ်ခုကျွန်တော်ပြောနိုင်တာကတော့ ဒီလိုမျိုးမျက်နှာစာမှာ စစ်ကောင်စီရဲ့ ကိုယ်စားလှယ် မရှိရဘူးဆိုတာ ပြတ်ပြတ်သားသားပြောလို့ရပါတယ်။ ပြည်သူ့သာအဓိကပါ” လို့ သံအမတ်ကြီးဦးကျော်မိုးထွန်းက ပြောပါတယ်။
ပြည်သူတွေရဲ့ အင်အားနဲ့သာ စစ်ကောင်စီပြုတ်ကျရေးကို ဆက်လက်လုပ်ဆောင်ရွက်ရမှာဖြစ်ပြီး အဆုံးအထိပါ ဝင်ပေးဖို့လည်း ဦးကျော်မိုးထွန်းက တိုက်တွန်းမေတ္တာရပ်ခံခဲ့ပါတယ်။
Public Service Announcement
“ပြည်သူတွေရဲ့ အင်အား၊ စည်းလုံးညီညွတ်မှုနဲ့ စစ်ကောင်စီပြုတ်ကျဖို့၊ ဖက်ဒရယ် ဒီမိုကရေစီနိုင်ငံတည် ထောင်ဖို့၊ ဆက်လက်ပြီးတော့ ကျရာကဏ္ဍအသီးသီးကနေ ပါဝင်ဆောင်ရွက်ပေးကြဖို့ ကျွန်တော် မေတ္တာ ရပ်ခံလိုပါတယ်။ ဆက်လက်ပူးပေါင်းဆောင်ရွက်ဖို့ စည်းစည်းလုံးလုံးညီညီညွတ်ညွတ် လက်တွေ တွဲယှက်ပြီးတော့ မြန်မာနိုင်ငံမှာ ဆောင်ရွက်နေတဲ့ စစ်ကောင်စီပြုတ်ကျရေး ဆက်လက်ဆောင်ရွက် သွားပေးသွားဖို့၊ NUG ကို ဆက်လက် ထောက်ခံပေးသွားဖို့ မေတ္တာ ရပ်ခံလိုပါတယ်” လို့ သံအမတ်ကြီးက ပြောပါတယ်။
ကုလသမဂ္ဂမှာ မြန်မာပြည်သူတွေနဲ့အတူရပ်တည်တဲ့ သံအမတ်ကြီး ဦးကျော်မိုးထွန်းကို ဆက်လက်ခန့်ထားဖို့နဲ့ အမျိုးသားညီညွတ်ရေးအစိုးရကို မြန်မာပြည်သူတွေက ထောက်ခံတဲ့အကြောင်း ဆန္ဒထုတ်ဖော်လှုပ်ရှားမှုကို နိုင်ငံ ပေါင်း ၁၈ နိုင်ငံမှာလုပ်ဆောင်နေကြပြီး မနေ့က အမေရိကန်မှာ နယူးယောက်မြို့အပြင် လော့စ်အိန်ဂျယ်လိစ်မြို့ မှာလည်း ပြုလုပ်ခဲ့ပါတယ်။
ဒါ့အပြင် ကနေဒါ၊ အိုင်ယာလန်၊ ဂျာမနီ၊ ဘယ်လ်ဂျီယံ စတဲ့ နိုင်ငံတွေက မြို့ကြီးတွေမှာလည်း ပြည်ပရောက်မြန် မာတိုင်းရင်းသားတွေ စစ်အာဏာရှင်စနစ်ကို ဆန့်ကျင်ကြောင်းနဲ့ ဖက်ဒရယ်ဒီမိုကရေစီနိုင်ငံတည်ဆောက်ဖို့ အရပ် သားအစိုးရကိုသာ လက်ခံကြောင်း ဆန္ဒထုတ်ဖော်ခဲ့ကြပါတယ်။
