မန္တလေးတိုင်း နွားထိုးကြီးမြို့နယ် လျှော်ဖြူကျေးရွာတွင် အကြမ်းဖက်စစ်ကောင်စီတပ်က ရွာအတွင်းလက်နက်ကြီးဖြင့်ပစ်ခတ်သဖြင့် အိမ်တစ်အိမ်ပေါ် လက်နက်ကြီးကျ၍ မိသားစုဝင်လေးဦး ပွဲချင်းပြီးသေဆုံးပြီး တစ်ဦး ဒဏ်ရာအပြင်းအထန်ရရှိခဲ့ကြောင်း ဒေသခံများက ပြောသည်။
ယနေ့( စက်တင်ဘာလ ၂၁ ရက်) နံနက် ၁၂နာရီ မိနစ်၂၀အချိန်တွင် အကြမ်းဖက်စစ်အုပ်စုဘက်မှ နွားထိုးကြီးမြို့အနောက်ဘက် လျှော်ဖြူကျေးရွာတွင် စည်းကမ်းမဲ့သေနတ်ပစ်ဖောက်မှုများ၊ RPGနှင့်ပစ်ခတ်မှုများကို ပြုလုပ်ခဲ့ကြောင်း၊ယင်းဖြစ်စဉ်တွင် လျှော်ဖြူ (အလယ်) ကျေးရွာ ဆီစက်အိမ်သို့ RPG အမြှောက်ဆံတစ်ခုကျရာ ၎င်းဆီစက်ရှိ မိသားစုဝင် (၄)ဦး သေဆုံး၍ (၁)ဦး အပြင်းအထန်ဒဏ်ရာရရှိခဲ့ကြောင်း နွားထိုးကြီးလူထုလှုပ်ရှားမှုကော်မတီက ယနေ့ သတင်းထုတ်ပြန် သည်။
“အခုဖြစ်တဲ့အိမ်နဲ့ တပ်စွဲထားတဲ့ကျောင်းနဲ့က သုံးလေးအိမ်လောက်ပဲဝေးတာ။ ညက ဖြစ်တာ ဘေးရွာတွေကတောင် ကြားရတယ်။”ဟု နွားထိုးကြီးနယ်ခံတစ်ဦးက ပြောသည်။
စစ်ကောင်စီတပ်များသည် အရက်သေစာသောက်စားပြီး အချင်းချင်းစကားများရန်ဖြစ်ရင်း ပစ်ခတ်ကြရာမှ ရွာအတွင်းနေအိမ်ပေါ်သို့ ကျရောက်ခဲ့ခြင်းဖြစ်သည်။အဆိုပါအိမ်အပြင် အခြားအိမ်များရှိ ပြည်သူအချို့လည်း ကျည်ဆန်ထိမှန်ဒဏ်ရာ ရရှိသူများရှိကြောင်း ဒေသခံတို့က ပြောသည်။
သေဆုံးသူများ၏ ရုပ်အလောင်းများကို ယနေ့နံနက် ၃နာရီအချိန်တွင် မေတ္တာမွန် နာရေးကူညီမှုအသင်း၏ အကူအညီဖြင့် နွားထိုးကြီးမြို့ရှိ ရင်ခွဲရုံသို့ ပို့ဆောင်ခဲ့ကြောင်း သိရသည်။