မြန်မာနိုင်ငံ၌ တစ်ပတ်အတွင်း တိုက်ပွဲနှင့်ပဋိပက္ခဖြစ်စဉ် ၁၂၆ကြိမ်ဖြစ်ခဲ့ရာ စစ်ကောင်စီတပ်ဖွဲ့ဝင် ၁၀၉ ဦးသေဆုံးပြီး ပြည်သူ ၃၃ဦး ကျဆုံးခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ယနေ့ ထုတ်ပြန်သည်။
စက်တင်ဘာ ၁၄ရက်မှ ၂၀ရက်အထိ တစ်ပတ်တာ အတွင်း ဖြစ်ခဲ့သည့် တိုက်ပွဲနှင့် ပဋိပက္ခ ဖြစ်စဉ်များနှင့်ပတ်သက်ပြီး ပြည်တွင်းသတင်းမီဒီယာ ၃၀ ၌ ဖော်ပြထားသည့် သတင်းများကို အခြေခံ၍ ပြုစုထုတ်ပြန်ခြင်းဖြစ်သည်။
တိုက်ပွဲနှင့် ပဋိပက္ခဖြစ်စဉ် ၁၂၆ခု မှာ စစ်ကောင်စီတပ်က အရပ်သားများအပေါ် အကြမ်းဖက်မှု ၄၂ကြိမ်၊ စစ်ကောင်စီအချင်းချင်း ပစ်ခတ်မှု ၁ကြိမ်၊ ပေါက်ကွဲမှု ၃၃ကြိမ်၊ လုပ်ကြံခံရမှု ၁၉ကြိမ်၊ ပြည်သူ့ခုခံတော်လှန်စစ် ၂၁ကြိမ်၊ လက်နက်ကိုင်တိုက်ပွဲများ ၁၀ကြိမ်တို့ ဖြစ်သည်ဟု ဖော်ပြထားသည်။
အဆိုပါ ဖြစ်စဉ်များကြောင့် စစ်ကောင်စီတပ်ဘက်မှ သေဆုံးမှု ၁၀၉ဦးရှိပြီး စစ်ကောင်စီဘက်မှ ဒဏ်ရာရရှိမှု ၃၄ဦး ရှိသည်ဟုဆိုသည်။ ထို့ပြင် ပြည်သူ ၃၃ဦး ကျဆုံးခဲ့ပြီး ၁၉ဦး ဒဏ်ရာရရှိကြောင်း ဖော်ပြထားသည်။
Public Service Announcement
အမျိုးသားညီညွတ်ရေးအစိုးရမှ စစ်အာဏာရှင်ဆန့်ကျင်ရေး ပြည်သူလူထု ခုခံတော်လှန်စစ် ကြေညာခဲ့သည့် စက်တင်ဘာ ၇ရက်နောက်ပိုင်း၌ ပြည်သူ့ရင်ခွင် ခိုလှုံလိုကြောင်း ဆက်သွယ်လာသူ အရေအတွက် တိုးပွားလာနေသည်ဟုလည်း ထုတ်ပြန်ခဲ့သည်။
နိုင်ငံတည်ငြိမ်အေးချမ်းမှုကို လိုလားသည့် တပ်မတော်သားများနှင့် ပြည်သူ့ရဲများ အနေဖြင့် ယခုအချိန်သည် နိုင်ငံကို ဆင်းရဲတွင်း နက်သထက်နက်အောင် ပြုလုပ်နေသည့် အာဏာသိမ်း အကြမ်းဖက်အဖွဲ့အစည်းကို စွန့်ခွာပြီး ပြည်သူ့ရင်ခွင် ခိုလှုံရန် အချိန်အခါကောင်းဖြစ် ကြောင်းလည်း ကာကွယ်ရေးဝန်ကြီးဌာနက အသိပေးထားသည်။
