တာမွေမြို့နယ်ရဲတပ်ဖွဲ့မှူးရုံးမှ ရဲတပ်သားတစ်ဦးကို အတွင်းသတင်းပေးဟုစွပ်စွဲကာ ရဲတပ်ဖွဲ့က ဖမ်းဆီးထားပြီး CDM ရဲများအား ချိတ်ဆက်ဖမ်းဆီးရန်စီစဥ်နေသည်ဟု သတင်းရရှိသည်။
CDM ပြုလုပ်နေသော ရဲတပ်ဖွဲ့ဝင်များက ၎င်းတို့ရရှိသည့် အထက်ပါ သတင်းကို ပြည်သူလူထုနှင့် လုပ်ဖော်ကိုင်ဘက်CDMရဲများအား လူမှုကွန်ရက်မှတစ်ဆင့် ယနေ့(စက်တင်ဘာ ၂၅) အသိပေးထားခြင်းဖြစ်သည်။
“တာမွေမြို့နယ်ရဲတပ်ဖွဲ့မှူးရုံးမှ ရဲတပ်သားတစ်ဦးအား အတွင်းသတင်းများ ပေါက်ကြားသည်ဟု စွပ်စွဲကာ စကစမှ ဖမ်းဆီးထိန်းသိမ်းထားကြောင်း။။ အဆိုပါရဲတပ် သားအား အသုံးချကာ CDM ပြုလုပ်နေသော ရဲတပ်ဖွဲ့ဝင် များအား ချိတ်ဆက်ခိုင်းပြီး စုံစမ်းဖော်ထုတ်ရန် စီစဥ်နေကြောင်း တပ်တွင်းဖရဲသီးမှ သတင်းပေးပို့လာသဖြင့် သတိထားနိုင်ရန် တင်ပြအပ်ပါသည်”ဟု သတင်းထုတ်ပြန် အသိပေးထားသည်။
အကြမ်းဖက်စစ်ကောင်စီကအာဏာသိမ်းပြီးနောက် CDM ပြုလုပ်သည့် ရဲတပ်ဖွဲ့ဝင် အရေအတွက်သည် ၅,၀၀၀ခန့်အထိရှိနေပြီး ချင်းပြည်နယ်မှ အများဆုံးဖြစ်သည်ဟု CDM ပြုလုပ်နေသော ရဲတပ်ဖွဲ့ဝင်များက ပြောသည်။
Public Service Announcement
