ထီးချိုင့်မြို့နယ်တွင် စစ်ကောင်စီသတင်းပေးဒလန်ဟု လူသိများသူနှင့် သူ၏မိသားစုမှ ကလေးငယ်ကိုသာချန်၍ ကျန်မိသားစုဝင်သုံးဦးကိုလူတစ်စုက သေနတ်ဖြင့် ပစ်သတ်သွားကြောင်း ဒေသခံများက ပြောသည်။
ထီးချိုင့်မြို့နယ် အေးချမ်းလွင်ကျေးရွာမှ ကိုဖိုးတုတ်ဆိုသူနှင့် ၎င်း၏ မိသားစုဝင်သုံးဦးကို စက်တင်ဘာ ၂၆ရက်ညနေတွင် လူတစ်စုကလာရောက်၍ သေနတ်ဖြင့် ပစ်သတ်သွားခြင်းဟု ဒေသခံများက ပြောသည်။
“အဲဒီလူ(ကိုဖိုးတုတ်)က ဒလန်လို့ လူသိများတယ်။လာသတ်သွားတာက မှန်တယ်။ လေးယောက်သေတယ်။ ကလေးတစ်ယောက်ကိုတော့ ဘာမှလုပ်မသွားဘူး။ ကျန်တာတော့ အသေးစိတ် မသိသေးဘူး”ဟု ဒေသခံတစ်ဦးကပြောသည်။
ကိုဖိုးတုတ်၏ မိသားစုတွင် အသက် ၃ နှစ်အရွယ်ကလေးငယ်တစ်ဦးရှိပြီး ယင်းကလေးကို သေနတ်သမားများက မထိခိုက်စေခဲ့၍ ရှင်သန်ကျန်ရစ်ခဲ့ကြောင်း ဒေသခံများက ပြောသည်။ အသေးစိတ်ကို မသိရသေးပေ။
ထီးချိုင့်မြို့သည် စစ်အာဏာ ရှင်တော်လှန်ရေးတွင် တက်ကြွသည့် မြို့ဖြစ်ပြီး အကြမ်း ဖက်စစ်ကောင်စီနှင့် KIA၊ဒေသခံPDF ပူးပေါင်းအဖွဲ့တို့မကြာခဏတိုက်ပွဲ ဖြစ်နေသည်။