မြဝတီ -ကော့ကရိတ် အာရှလမ်းမကြီးပေါ် တိုက်ပွဲတွင် ဒီကေဘီအေ(ခွဲထွက်)အဖွဲ့နှင့် အာဏာသိမ်းစစ်ကောင်စီတို့ တိုက်ပွဲဖြစ်ပွားခဲ့ရာ စစ်ကောင်စီဘက်မှ ဗိုလ်မှူးကြီးကျော်ဆွေမျိုး ဒဏ်ရာရပြီးစစ်ကောင်စီတပ်ဖွဲ့ဝင် အချို့သေဆုံးခဲ့ကြောင်း ဒေသခံများက ပြောသည်။
အကြမ်းဖက်စစ်ကောင်စီအရာရှိများလိုက်ပါလာသည့် ယဉ်တန်းကို ဒီကေဘီအေ(ခွဲထွက်)အဖွဲ့က ယနေ့နံနက်ပိုင်းတွင် ကြားဖြတ်တိုက်ခိုက်ခဲ့ခြင်းဖြစ်သည်ဟု ဒေသခံအချို့က ပြောသည်။DKBA ( ခွဲထွက်) အဖွဲ့မှာ ဗိုလ်ချုပ်စောကျော်သက် ဦးဆောင်သောအဖွဲ့ဖြစ်သည်။
“ဒဏ်ရာရတာက ကော့ကရိတ်အခြေစိုက်ရစကခ(၁၂)က ဗိုလ်မှူးကြီးကျော်ဆွေမျိုး။ သူ့ကို သယ်သွားတယ်။ အသေးစိတ်တော့ မသိရသေးဘူး”ဟု ဒေသခံတစ်ဦးကပြောသည်။
စစ်ကောင်စီ၏ အရာရှိအဆင့် ထိခိုက်ခဲ့ခြင်းဖြစ်၍ တိုက်ပွဲဖြစ်သည့်ပတ်ဝန်းကျင်ကျေးရွာများကို အညိုးထားကာ တိုက်ခိုက်လာမည်ကို ဒေသခံများက စိုးရိမ်နေကြသည်။
Public Service Announcement
ယနေ့နံနက်တွင် တိုက်ပွဲဖြစ်ပွားပြီးနောက် ညနေ သုံးနာရီခန့်အထိ စစ်ကောင်စီဘက်က လက်နက်ကြီးများ ပစ်ခတ်နေသည်ဟု ဒေသခံများက ပြောသည်။
