စစ်အာဏာရှင်ဆန့်ကျင် ရေး ဆန္ဒပြနေတဲ့ မန္တလေး က သံဃာသမဂ္ဂသပိတ်စစ်ကြောင်း ဖြိုးခွင်းခံရပြီး ဆန္ဒပြသံဃာတော် ၅ဦးခန့်နဲ့ လူအချို့ ဖမ်းဆီးခံခဲ့ရတယ်လို့ စုံစမ်းသိရပါတယ်။
သံဃာသမဂ္ဂသပိတ်စစ်ကြောင်းဟာ ဒီနေ့ မွန်းလွဲပိုင်း ၂နာရီလောက်က မဟာအောင်မြေမြို့နယ် ရွှေဘိုကျောင်း အနီးမှာ စစ်အာဏာရှင် ဆန့်ကျင်ရေး ချီတက်ဆန္ဒပြနေချိန် ကားနဲ့ဝင်တိုက်ပြီး အကြမ်းဖက်ဖမ်းဆီးသွားခဲ့တာဖြစ်တယ်လို့ ဆန္ဒပြသံဃာတွေထံကနေစုံစမ်းသိရပါတယ်။
“အခုတော့ တချို့ကိုယ်တော်တွေလည်းရှောင်နေကြတယ်။ ဖမ်းခံလိုက်ရတဲ့ကိုယ်တော် ၅ဦးထပ်တော့ မနည်းဘူး။ လူတချို့လည်းပါသွားကြတယ်။”ဟု ဆရာတော်တစ်ပါးကမိန့်ကြားပါတယ်။
လာရောက်ဖမ်းဆီးချိန်က စစ်ကောင်စီတပ်ဖွဲ့ဝင် အင်အားအများအပြားပါလာပြီး ထပ်မံကာ အရပ်ဝတ်တွေနဲ့ ပါရောက်ရှိလာတယ်လို့သိရပါတယ်။
Public Service Announcement
လက်ရှိမှာတော့ စိန်ပန်းရပ်ရှိ ဘုန်းကြီးကျောင်းအချို့မှာ ဆန္ဒပြ သံဃာတွေရှိနေနိုင်တယ်လို့ဆိုပြီး စစ်ကောင်စီတပ်ဖွဲ့ဝင်တွေက လိုက်လံရှာဖွေနေတယ်လို့သိရပါတယ်။
ပြီးခဲ့တဲ့ စက်တင်ဘာလ ၂၈ရက်ကလည်း သံဃာသမဂ္ဂစစ်ကြောင်းကနေ လိုက်ပါဆန္ဒပြလေ့ရှိတဲ့ ကင်းဝန်မင်းကြီးကျောင်းတိုက် က ဆရာတော် ဦးပညာသီဟ ကို ကျောင်းအတွင်းဝင်ရောက်စီးနင်း ဖမ်းဆီးခဲ့ပါသေးတယ်။
