ကရင်နီ(ကယား)ပြည်နယ်တွင် စစ်အာဏာရှင်တွန်းလှန်ရင်း ဘေးလွတ်ရာတောတောင်သို့ ထွက်ပြေးတိမ်းရှောင်နေရသောစစ်ဘေးဒုက္ခသည် ပြည်သူများဆီ အရောက်သွား၍ အရေးပေါ်အစားအသောက်နှင့် အသုံးအဆောင်အချို့အပါအဝင် ခွန်အားပေးနှစ်သိမ့်မှုအစီအစဥ်ပြုလုပ်ခဲ့ကြောင်း Free Burma Ranger-Karenni က ထုတ်ပြန်သည်။
“စစ်ရှောင်စခန်းတိုင်းလိုလို ဖျားနာနေကြတာ။ ဆေးဝါးအလုံအလောက်မပို့ပေးနိုင်သေးပေမဲ့ အတတ်နိုင်ဆုံးကြိုးစားပေးပါတယ်။ခက်ခဲကြပ်တည်းတဲ့ဒီလိုကာလမှာ ကိုယ်ကိုတိုင်က ပြုံးပျော်ဖို့အလွန်ခက်ခဲပေမဲ့ စစ်ရှောင်ပြည်သူတွေရှေ့မှာ ကြိုးစားခဲ့တယ်”ဟု Free Burma Ranger – Karenni အဖွဲ့က ပြောသည်။
ကယားပြည်နယ်၌ အာဏာသိမ်းစစ်ကောင်စီကို ခုခံတိုက်ပွဲဆင်နွှဲမှုမှာစက်တင်ဘာလကစ၍ ပိုမိုအရှိန်မြင့်လာပြီး အာဏာသိမ်းစစ်တပ်ကလည်း အင်အားတိုးချဲ့၍ ထိုးစစ်ဆင်မှုများပြုလုပ်ကာ ကျေးရွာလူနေအိမ်များကို မီးရှို့ခြင်း မိုင်းထောင်ခြင်း နှင့် ဖမ်းဆီးသတ်ဖြတ်မှုများပြုလုပ်နေသည်။
ဒီးမော့ဆို၊လွိုင်ကော်၊ဖယ်ခုံ၊လွိုင်လင်လေး၊မိုးဗြဲ၊ ဘောလခဲ ၊ ဖရူဆို နှင့် ဖားဆောင်းမြို့နယ်များ၌ အာဏာသိမ်းစစ်ကောင်စီနှင့် ထိတွေ့ တိုက်ပွဲများရှိနေသည်ဟု တိုးတက်သော ကရင်နီ ပြည်သူ့အင်အားစုက ဆိုသည်။
Public Service Announcement
ထို့ကြောင့် စစ်ဘေးဒုက္ခသည်ပြည်သူအရေအတွက်မှာ နေ့စဥ်တိုးလာနေပြီး ဒုက္ခသည် ၃၀,၀၀၀ ကျော်ရှိနေပြီဖြစ် ကြောင်း ကရင်နီလူမှုအဖွဲ့အစည်းများက ထုတ်ပြန်ထားသည်။
