သြဂုတ် ၈၊၂၀၂၆။သုည/People’s Spring
ကရင်နီပြည်နယ်နဲ့ စစ်ကိုင်းတိုင်းအတွင်းက တော်လှန်သပိတ်အင်အားစုတွေ၊ ဒေသခံပြည်သူတွေဟာ (၃၈) နှစ်မြောက် ရှစ်လေးလုံး အရေးတော်ပုံနေ့ အထိမ်းအမှတ်အဖြစ် လှုပ်ရှားမှုတွေ ဒီကနေ့ (သြဂုတ် ၈) မှာ ပြုလုပ်ခဲ့ပါတယ်။
ကရင်နီပြည်နယ်၊ ဒီးမော့ဆိုမြို့နယ် တနေရာမှာ (၃၈) နှစ်မြောက် ရှစ်လေးလုံးအရေးတော်ပုံ အထိမ်းအမှတ် အခမ်းအနားကို ကျေးလက်မြေအဖွဲ့က ဦးဆောင်ပြီး ပြုလုပ်ခဲ့ပါတယ်။
အခမ်းအနားမှာ ကျောင်းသူ ကျောင်းသား လူငယ်တွေ၊ ဒေသခံတွေနဲ့အတူ လွိုင်နန်းဖမြို့နယ်အုပ်ချူပ်ရေးမှူးနဲ့ KSCC အဖွဲ့ကတာဝန်ရှိသူတွေလည်း တက်ရောက်ခဲ့ကြ ပါတယ်။
Public Service Announcement
စစ်ကိုင်းမြို့နယ် နေရာအသီးသီးမှာလည်း စစ်ကိုင်းမြို့နယ် လူထုသပိတ်အင်အားစုက တော်လှန်ပြည်သူတွေက ရှစ်လေးလုံး ဒီမိုကရေစီအရေးတော်ပုံကြီး (၃၈) နှစ်ပြည့်မြောက် လူထုလှုပ်ရှားမှုတွေ လုပ်ဆောင်ခဲ့ပါတယ်။
ဒေသခံတော်လှန်ပြည်သူတွေက “ပုန်ကန်တော်လှန်စိတ်ကိုအမွေပေးကြ” ၊ “လူငယ်တွေကို နေရာပေးကြ” ၊ “၈၈ စိတ်ဓာတ်ဆွဲကိုင်တော်လှန်ကြ” စတဲ့ စာသားတွေနဲ့ ဆန္ဒထုတ်ဖော်ပြသခဲ့ပါတယ်။
ကလေးမြို့နယ်မှာလည်း လူထုတိုက်ပွဲဦးဆောင်ကော်မတီက “ရှစ်လေးလုံး အရေးတော်ပုံ” ၃၈ နှစ်ပြည့်အထိမ်းအမှတ်လှုပ်ရှားမှုအဖြစ် “မပြီးဆုံးသေးတဲ့ ၈ လေးလုံး လူထုလွတ်မြောက်ရေး ဒို့အတူရုန်း” ခေါင်းစဥ်နဲ့ လူထုဟောပြောပွဲ ပြုလုပ်ခဲ့ပါတယ်။
ဘုတလင်မြို့နယ်မှာလည်း သပိတ်အင်အားစုဝင်တွေနဲ့ ကျေးရွာ ( ၂ ) ရွာမှ ကျောင်းသားပြည်သူတွေက ရှစ်လေးလုံး အရေးတော်ပုံ ( ၃၈ ) နှစ်ပြည့် အထိမ်းအမှတ်အဖြစ် “ပေးဆပ်သွားတဲ့မျိုးဆက်အတွက် ဒို့မျိုးဆက်က သွေးကြွေးဆပ်” စာသားနဲ့ လူထုလှုပ်ရှားမှု ဟောပြောပွဲ ပြုလုပ်ခဲ့ပါတယ်။
တက်ရောက်လာသော ကျောင်းသားပြည်သူတွေကို ရှစ်လေးလုံး အရေးတော်ပုံနဲ့ပတ်သတ်ပြီး ရှင်းပြခြင်း၊ လက်ရှိနွေဦးတော်လှန်ရေးမှာ စစ်အာဏာရှင် အမြစ်ပြတ်သည်အထိ တိုက်ပွဲဝင်သွားကြဖို့ စည်ရုံးလှုံ့ဆော်ခြင်းတွေ လုပ်ဆောင်ခဲ့ပါတယ်။
ဓာတ်ပုံ – GSCB ၊ ကလေးမြို့နယ်လူထုသပိတ်၊ စစ်ကိုင်းဒေသသပိတ်အင်အားစု
