ကယားပြည်နယ်တွင် စစ်​ကောင်စီတပ်က အရပ်သားကားများကိုအသုံးပြု၍ စစ်ကူပို့​နေ

အကြမ်းဖက်စစ်ကောင်စီတပ်များသည် ဖရူဆို၊ ဘောလခဲနှင့် ဖားဆောင်းမြို့နယ်များသို့ စစ်အင်အားဖြည့်တင်းရန်နှင့် ရှေ့တန်းတပ်များသို့ စစ်ကူပို့ရာတွင် အရပ်သားကားများအသုံးပြုနေကြောင်း ကရင်နီအမျိုးသားကာ ကွယ်ရေးတပ်ဖွဲ့(KNDF)က ထုတ်ပြန်သည်။

စစ်ကောင်စီက အရပ်သားကားများဖြင့် လွိုင်ကော်- ဒီးမော့ဆို- ဖရူဆို -ဖားဆောင်လမ်း လမ်းမကြီးအတိုင်း လှုပ်ရှားနေကြောင်းလည်း KNDFက အတည်ပြုသည်။

“အခုရက်ပိုင်း ထိတွေ့တိုက်ပွဲ ကြီးကြီးမားမား ဖြစ်မလာသေးဘူး။အဲဒါက ပိုပြီး သတိပြုရတဲ့အခါမှာ သူတို့အနေနဲ့က ဗျူဟာ အရသေချာပြင်ဆင်နေတယ်။အဲဒီထဲကမှ စစ်တပ်က အရပ်သားကားသုံးပြီး လှုပ်ရှားတာ များလာတယ်”ဟု KNDFမှ တာဝန်ရှိသူတစ်ဦးက ပြောသည်။

ထို့ကြောင့် ပြည်သူများအနေဖြင့် လွိုင်ကော်၊ဒီးမော့ဆို၊ဖရှုဆို၊ဘောလခဲနှင့် ဖားဆောင်းမြို့နယ်အတွင်းရှိ လမ်းကြီးနှင့် လမ်းပိုင်းအတွင်း ခရီးသွားလာပါက ကားမှန်အလုံပိတ်၍ သွားလာခြင်းမပြုဘဲ ကားမှန်ချထားရန်လည်း အထူးသတိပေးထားသည်။

Public Service Announcement

ထိုဒေသများတွင်လည်း လှုပ်ရှားနေသော တော် လှန်ရေးပျောက်ကျားတပ်များနှင့် ပြည်သူ့ ကာ ကွယ်ရေးတပ်များက လုံခြုံရေးအရစောင့်ကြည့်သွားမည်ဟု အသိပေးသည်။

စက်တင်ဘာလအတွင်းကစ၍ အာဏာသိမ်းစစ်တပ်က ကယားပြည်နယ်ကို စစ်ရေးအရ အင်းအား အများအ ပြားဖြင့်ထိုးစစ်ဆင်ခဲ့ပြီး စစ်ကောင်စီ တပ်သားအများအ ပြားသေဆုံးပြီး ပြည်သူ့ကာကွယ်ရေးတပ်ဖွဲ့ဝင်အချို့လည်း ကျဆုံးခဲ့သည်။

ကယားပြည်နယ်၌ ဒီးမော့ဆို၊ လွိုင်ကော်၊ ဖယ်ခုံ၊ လွိုင်လင်လေး ၊မိုးဗြဲ၊ ဘောလခဲ ၊ ဖရူဆို နှင့် ဖားဆောင်းမြို့နယ်များ၌ အာဏာသိမ်း စစ်ကောင်စီ နှင့် ထိတွေ့တိုက်ပွဲများကြောင့် စစ်ရှောင်ပြည်သူအရေအတွက်မှာ ​လေးသောင်းခန့်ရှိနေပြီဟု သိရသည်။