အောက်တိုဘာ-၁၀၊၂၀၂၆။ထားမြတ်/People’s Spring
ကချင်ပြည်နယ်ကို စစ်ကူ နဲ့ လက်နက်ခဲယမ်းဖြည့်တင်းဖို့ ကြိုးစားနေတဲ့ အာဏာသိမ်းစစ်တပ်ရဲ့ ယာဥ်တန်းတွေကို လမ်းမှာကြားဖြတ်တိုက်ခိုက်ခဲ့ရာ စစ်တပ်ယာဉ်အချို့ မီးလောင်ခဲ့ကြောင်း ကချင်စစ်ရေးသတင်းရင်းမြစ်ကပြောပါတယ်။
အောက်တိုဘာ ၁၀ရက်က မန္တလေးကနေ ထွက်လာတဲ့ ကားအစီးရေ ၁၃၃ စီးပါ စစ်တပ်ယာဉ်တန်းဟာ အောက်တိုဘာ ၁၁ရက် ကသာမြို့ကို အဝင်မှာ တိုက်ခိုက်ခံရတာဖြစ်ပြီး ယာဉ်တန်းပါဒရုန်းကား၂စီးမီးလောင်ကျန်နေခဲ့တယ်လို့ ဆိုပါတယ်။ အခုညပိုင်းမှာတော့ စစ်တပ်ယာဉ်တန်းရဲ့ရှေ့ဆုံးကားတွေ ကချင်ပြည်နယ် မိုးညှင်းမြို့ကို ဝင်ရောက်ခဲ့ကြောင်း သတင်းရင်းမြစ်က အသိပေးပါတယ်။
“တိုက်ခိုက်မှု အသေးစိတ် မသိရသေးဘူး။ ကား ၅၀ ခန့်ကစစ်အင်အား ၊ ကျန်တာရိက္ခာ၊ လူသုံးကုန်၊ ဆီတွေလို့ သိရတယ်။ ရည်မှန်းချက်ကတော့ မြစ်ကြီးနားလို့ သုံးသပ်တယ်” လို့ ကချင်စစ်ရေးသတင်းရင်းမြစ်ကပြောပါတယ်။
Public Service Announcement
ကချင်ပြည်နယ်ကို စစ်တပ်က နည်းမျိုးစုံ ကုန်းလမ်း၊ရေလမ်း စတဲ့ လမ်းကြောင်းမျိုးစုံကနေ အင်အားဖြည့်တင်းဖို့ ကြိုးပမ်းနေသလို ကချင်လွတ်လပ်ရေးတပ်မတော်(KIA) ပူးပေါင်းတပ်ကလည်း စစ်တပ်ရဲ့ စစ်ကူဖြည့်တင်းမှုတွေအပေါ် ကြားဖြတ်တိုက်ခိုက်မှုတွေ ဆက်တိုက်လုပ်နေပါတယ်။
အခုဝင်လာတဲ့ စစ်တပ်ယာဉ်တန်းမှာပါလာတဲ့ တပ်သားတွေထဲမှာစစ်တပ်က အဓမ္မ စစ်သားစုဆောင်းထားတဲ့စစ်မှုထမ်းတပ်သားသစ်တွေ အများစုပါလာနိုင်ကြောင်းလည်း သတင်းရင်းမြစ်က သုံးသပ်ပါတယ်။
စစ်တပ်ဟာ သြဂုတ်လကုန်နဲ့စက်တင်ဘာလဆန်းကလည်း ကချင်ပြည်နယ် ဗန်းမော်ကို ရေကြောင်းကနေ စစ်ကူ၊ လက်နက် ခဲယမ်း ရိက္ခာတွေဖြည့်တင်းဖို့ ကြိုးပမ်းခဲ့ရာ KIA ပူးပေါင်းတပ်ရဲ့ တိုက်ခိုက်မှုကြောင့်အထိနာခဲ့ပါတယ်။ ဩဂုတ်လကုန်နဲ့ စက်တင်ဘာလ တိုက်ပွဲတွေအတွင်း ရွှေကူ-ဗန်းမော်ကြား ရေကြောင်း တိုက်ပွဲမှာ စစ်တပ်သင်္ဘော အစီး ၂၀ ခန့်ကို KIA ပူးပေါင်းတပ်က တိုက်ခိုက်ဖျက်ဆီးခဲ့ပါတယ်။သင်္ဘောအချို့ ကမ်းကပ် အလံဖြူထောင်ခဲ့လို့ စစ်ကောင်စီတပ်ဖွဲ့ဝင် ၁၁၈ဦးထက်မနည်း စစ်သုံပမ်းအဖြစ်ဖမ်းမိခဲ့ပါတယ်။
လက်ကျန်သင်္ဘောအချို့ ဗန်းမော်ကို ရောက်သွားလို့ စစ်တပ်ကစစ်အင်အားအထိုက်အလျောက်ဖြည့်တင်းနိုင်ခဲ့ပြီးအဲဒီနောက်ပိုင်း ဗန်းမော်မြို့မှာတိုက်ပွဲတွေပြန်လည်ပြင်းထန်နေ ပါတယ်။
စစ်ကောင်စီတပ်ဟာ ကချင်ဒေသ စစ်မျက်နှာမှာ နည်းမျိုးစုံနဲ့ အင်အားဖြည့်တင်းတာ၊ လူသစ်စုဆောင်းတာ၊ ပေါ်တာ ဆွဲတာတွေပိုလုပ်နေသလို စစ်တပ် လက်အောက်ခံ ပြည်သူ့စစ်အဖွဲ့တွေထပ်မံဖွဲ့စည်းပေးပြီး အင်အားပိုကြီးထွားအောင်လုပ်နေတာတွေ့ရပါတယ်။
