မကွေးတိုင်း၊ ဆော-ကျောက်ထုလမ်းပိုင်းတွင် အကြမ်းဖက်စစ်ကောင်စီတပ်ကို ခုခံတိုက်ပွဲဝင်ရင်းအသက် ၁၉ နှစ်အရွယ်ပြည်သူ့ကာကွယ်ရေးတပ်သားတစ်ဦးအသက်ပေးလှုသွားကြောင်း Yaw Defense Force-YDF က ပြောသည်။
ယောဒေသကာကွယ်ရေးတပ်ဖွဲ့-YDF(ဆော -ကျောက်ထု ) တပ်ဖွဲ့ဝင်ရဲဘော်တစ်ဦးသည် အောက်တိုဘာလ ၉ ရက်နေ့တွင် ဖြစ်ပွားခဲ့သည့် တိုက်ပွဲ၌ ပြည်သူလူထုအား ရက်စက်စွာ ဖိနှိပ်အုပ်ချုပ်နေသော အကြမ်းဖက်စစ်ကောင်စီတပ်သားများကို တော်လှန်ရင်း အသက်ပေးလှုသွားခဲ့ကြောင်း YDFက ယနေ့မနက်ပိုင်းတွင် သတင်းထုတ်ပြန်ခဲ့သည်။
ကျဆုံးသူမှာ အသက် ၁၉ နှစ်အရွယ် လူငယ်တစ်ဦးဖြစ်ပြီး ဆော-ကျောက်ထုလမ်းပိုင်းတိုက်ပွဲတွင်ပြည်သူနှင့် နိုင်ငံတော်အတွက် အသက်ပေးလှုသွားရခြင်းဖြစ်ကြောင်း YDF က People’s Spring သို့ပြောကြားသည်။
ကျဆုံးသူ၏ ရုပ်အလောင်းအား တောတွင်းတစ်နေရာတွင် ကောင်းမွန်စွာ ဂူသွင်းမြေမြှုပ်သဂြိုလ်ပေးခဲ့ပြီး ကျန်ရစ်သူရဲဘော်များက အလေးပြုခဲ့ကြသည်။
Public Service Announcement
စစ်အာဏာရှင် အမြစ်ပြတ်ချုပ်ငြိမ်းရေးအတွက် YDF(ဆော- ကျောက်ထု) ရဲဘော်တစ်ဦး၏ ပေးဆပ်မှုကို YDF မှ အလေးပြုကြောင်းနှင့် ကျန်ရစ်သူမိသားစုနှင့်တကွ ထပ်တူထပ်မျှ ကြေကွဲဝမ်းနည်းရပါကြောင်း ညှိုးငယ်သောစိတ်ထားဖြင့် YDFက အသိပေးခဲ့သည်။
အောက်တိုဘာလ ၉ ရက်နေ့ နံနက် ၅ နာရီအချိန်ခန့်က ဆော-ကျောက်ထု လမ်းပိုင်းတွင် အကြမ်းဖက်စစ်ကောင်စီတပ်ဘက်မှ စစ်ကြောင်းနှစ်ကြောင်း၊ စစ်အင်အား (၁၅၀) ကျော်ဖြင့် ချီတက်လာရာ YDF-ဆော-ကျောက်ထုပျောက်ကျားတပ်ဖွဲ့ ကမိုင်းအကြီး (၂)လုံး ၊ ပဒေသာမိုင်း အလုံး (၄၀)၊ လက်နက်ကြီး (၇)ချက်ဖြင့် ဖောက်ခွဲတိုက်ခိုက်ခဲ့ရာ အကြမ်းဖက် စစ်ကောင်စီတပ်မှ (၂၀)ဦးထက်မနည်းသေဆုံးပြီး အများအပြားဒဏ်ရာရရှိခဲ့ကြောင်း YDF မှ သတင်းအတည်ပြုထုတ်ပြန်ထားသည်။
တိုက်ပွဲသည် တစ်နေကုန်ကြာမြင့်ခဲ့ပြီး ညနေ ၄-နာရီ အချိန်ခန့်တွင် ပြီးဆုံးခဲ့ကြောင်း YDF က အသိပေးသည်။
အောက်တိုဘာလ ၈ရက်နေ့ကလည်း ဆောမှကျောက်ထုဘက်သို့ အကြမ်းဖက်စစ်ကောင်စီမှ စစ်ကားငါးစီးနှင့်စစ်အင်အားတစ်ရာကျော် ချီတက်လာရာ YDF-Saw & Kyaukhtu မှ မိုင်းနှစ်လုံးခွဲ၍ တိုက်ခိုက်ခဲ့ပြီး စစ်ကောင်စီတပ်သားအချို့ သေဆုံး ဒဏ်ရာရသေဆုံးမှုများ ရှိခဲ့သည်။
