ပဲခူးတိုင်း သက္ကလမြို့အတွင်းရှိ စစ်ကောင်စီခန့် ရွှေပြည်အေးရပ်ကွက်အုပ်ချုပ်ရေးမှူးအား ယနေ့ နံနက် ၁၁ နာရီဝန်းကျင်တွင် ပစ်သတ်ခံရကြောင်း ဒေသခံများက ပြောသည်။
ရွှေပြည်အေးရပ်ကွက်အုပ်ချုပ်ရေးမှူး အောင်မင်းဦးသည် ပဲခူး-သက္ကလ ကားမှတ်တိုင်(ဇော်ထွေးကွမ်းယာဆိုင်)တွင် ကွမ်းယာ၀ယ်နေရင်း သေနတ်ဖြင့် ၅ ချက် ပစ်ခတ်ခံရပြီး နေရာတွင်ပင်ပွဲချင်းပြီး သေဆုံးသွားခြင်းဖြစ်သည်။
“သူကွမ်းဝယ်နေတုန်း ဆိုင်ကယ်နဲ့ လာပစ်သွားတာ။အခု အဲဒီနားပတ်လည်မှာ စစ်ခွေးတွေအများကြီးပဲ”ဟု ဒေသခံတစ်ဦးက ပြောသည်။
ထို့အပြင် ပဲခူးမြို့၌ ဒလန် အဖြစ် နာမည်ကြီးသော သရက်တော (၁) လမ်းရှိ ရာအိမ်မှူးမှာ နေအိမ်တွင် ယနေ့နံနက် (၆)နာရီခန့်က ဗုံးပေါက်ကွဲ၍ ရာအိမ်မှူးအပါအဝင် မိသားစုဝင်လေးဦးဒဏ်ရာရသွားကြောင်း ဒေသခံမီဒီယာများက ဖော်ပြသည်။
အောက်တိုဘာ ၁၀ ရက်ကလည်း ပဲခူးတိုင်း၊ နတ်တလင်းမြို့နယ်၊ တောင်ညိုမြို့သစ်မှ စစ်တပ်သတင်း ပေးလက် နက်ကိုင် ပျူစောထီးအဖွဲ့ဝင်လည်းဖြစ်သူ ကျောက်ပိုးဒိုး(ခ)ကိုဖြိုးမှာလည်းသေနတ်ဖြင့်ပစ်ခတ်ခံရပြီး သေဆုံးခဲ့သည်။