မရမ်းကုန်းမြို့နယ်၊ သမိုင်းလမ်းဆုံး City Mart ရှေ့ရှိ ယာဥ်ထိန်းရဲရုံး အနီး ယနေ့ မွန်းလွှဲ ၁ နာရီခွဲခန့် က ဗုံးပေါက်ကွဲခဲ့ပြီး စစ်ကောင်စီတပ်ဖွဲ့ဝင်အချို့ ဒဏ်ရာရရှိခဲ့ကြောင်း မျက်မြင်တွေ့ရှိသော ပြည်သူအချို့က ပြောသည်။
အဆိုပါ ယာဥ်ထိန်းရဲရုံးတွင် စစ်ကောင်စီတပ်ဖွဲ့များကနေ့စဥ် လုံခြုံရေးယူလေ့ရှိကြောင်း မရမ်းကုန်းမြို့နယ်နေပြည်သူတစ်ဦးက ပြောသည်။
“အဲဒီရုံးထဲမှာ သူတို့က ကင်းပုန်းအမြဲဝပ်နေတာ။ပြီးတော့ food panda က ကောင်လေးတွေလည်းရှိနေတယ်။ဒီနေ့ နှစ်ချက်ပေါက်သံကြားတယ်။စစ်ခွေးတချို့ သွေးတွေ ထွက်ပြီး လိုက်ရမ်းနေသလို food panda ကောင်လေးတစ်ယောက်လည်း လက်ဖျံ ထိသွားတယ်”ဟု အဆိုပါဒေသခံကပြောသည်။
ပေါက်ကွဲမှု ဖြစ်ပြီးနောက်သမိုင်းလမ်းဆုံ မီးပွိုင့်အနီး လမ်းလေးခွဆုံကို အကြမ်းဖက်စစ်ကောင်စီတပ်ဖွဲ့ဝင်များက လမ်းများပိတ်ဆို့၍ ရှာဖွေစစ်ဆေးမှုများ ပြုလုပ်နေသည်။
ရန်ကုန်အခြေစိုက် တော်လှန်ရေးအဖွဲ့များက ခုခံစစ်အရှိန်မြှင့်တော့မည်ဖြစ်၍ CCTV များဖြုတ်ထားရန် ၊ စစ်ကောင်စီယာဥ်နှင့်တပ်ဖွဲ့ဝင်များအနီးတွင်မနေရန် အကြိမ်ကြိမ် သတိ့ပေးထားသည် ။