စစ်ကိုင်းတိုင်း၊ ရွှေဘိုခရိုင်၊ အရာတော်မြို့နယ်တွင် ယနေ့ညနေပိုင်းက စစ်ကားနှစ်စီး မိုင်းခွဲတိုက်ခိုက်ခံရကြောင်း ဒေသခံများက ပြောသည်။
ယနေ့ အောက်တိုဘာလ ၁၁ ရက် ညနေ ၃ နာရီဝန်းကျင်က အရာတော်-မုံရွာလမ်းပေါ်တွင် အရာတော်ဘက်သို့ ဦးတည်လာနေသော စစ်ကားနှစ်စီးကို အရာတော်မြို့နယ် တော်လှန်ရေးအင်အားစု(ARA)မှ မိုင်းခွဲတိုက်ခိုက်ခဲ့ကြောင်း အရာတော်မြို့နယ် သတင်းမှန်ပြန်ကြားရေးအဖွဲ့က သတင်းထုတ်ပြန်သည်။
ကားနှစ်စီးလုံးကို မိမိရရမိုင်းဆွဲတိုက်ခိုက်နိုင်လိုက်သဖြင့် ယာဉ်များမထိခိုက်သော်လည်း ယာဉ်ပေါ် ပါစစ်ကောင်စီတပ်သားများ ထိ့ခိုက်မှုရှိကြောင်း ARA မှ ဗိုလ်တိုက်မောင်းက အတည်ပြုပေးထားကြောင်း သတင်းထုတ်ပြန်ချက်တွင် ဖော်ပြသည်။
မိုက်ဆွဲတိုက်ခိုက်ခံရပြီးနောက်စစ်ကားနှစ်စီးမှာ ဝါးတန်းရွာနှင့် ကျွန်းဖိုပင်ကြားရှိ အဆိုပါ နေရာတွင် ခေတ္တရပ်တန့်သွားပြီး အကြမ်းဖက်စစ်ကောင်စီတပ်သားများက ကြောက်လန့်တကြား ပြန်လည်ပစ်ခတ်ရင်း အရာတော်သို့ ဆက်လက်မောင်းပြေးသွားကြောင်း အရာတော်မြို့နယ် သတင်းမှန်ပြန်ကြားရေးက အသိပေးထားသည်။
Public Service Announcement
မိုင်းခွဲတိုက်ခိုက်မှုဖြစ်စဥ်မှာ မှန်ကန်ကြောင်းနှင့် ထိခိုက်သည့်စစ်ကားများသည် မုံရွာမြို့မှထွက်ခွာလာသည့်စစ်ကားများဖြစ်ကြောင်း အရာတော်မြို့နယ် တော်လှန်ရေးအင်အားစု ARAမှ ပြောရေးဆိုခွင့်ရှိသူက People’s Spring သို့အတည်ပြု ပြောကြားသည်။
