ဘားအံမြို့နယ်မှာ နယ်ခြားစောင့်တပ် (BGF)နဲ့ စစ်ကောင်စီပူးပေါင်းတပ်ဖွဲ့တို့ ပြီးခဲ့တဲ့ရက်ပိုင်းက အရပ်သားပြည်သူတစ်ဦးကို သေနတ်နဲ့ပစ်သတ်လိုက်တယ်လို့ ကေအဲန်ယူက သတင်းထုတ်ပြန်ပါတယ်။
အောက်တိုဘာ ၁၀ ရက် ညနေပိုင်းက ဘားအံမြို့နယ် တကောင်ဘိုးကျေးနယ် မီးပုံးကျေးရွာ ဘုန်းကြီးကျောင်းအနီး လမ်းမပေါ်မှာ နယ်ခြားစောင့်တပ် (၁၀၁၄) တပ်ရင်းနဲ့အကြမ်းဖက်စစ်ကောင်စီပူးပေါင်းတပ်တို့က အရပ်သားပြည်သူတစ်ဦးကို သေနတ်နဲ့ ပစ်သတ်လိုက်တာလို့ ထုတ်ပြန်ချက်မှာပါရှိပါတယ်။
အဆိုပါရွာသားဟာ မီးပုံးကျေးရွာမှာ နေထိုင်တဲ့သူတစ်ဦးဖြစ်ပြီး အသက် ၅၀ ဝန်းကျင်ရှိကာ ဖာပွန်မြို့နယ်ထဲကနေ လာရောက်ရွှေ့ပြောင်းနေထိုင်သူတစ်ဦး ဖြစ်တယ်လို့ ကေအဲန်ယူ ဘားအံမြို့နယ် သတင်းပြန်ကြားရေးဌာန တာဝန်ရှိသူက ပြောပါတယ်။
အကြမ်းဖက်စစ်ကောင်စီနဲ့ နယ်ခြားစောင့်တပ်ပူးပေါင်းတပ်ဖွဲ့ဟာ ကေအဲန်ယူထိန်းချုပ်နယ်မြေတွေထဲမှာ လူ့အခွင့်အရေးချိုးဖောက်မှုတွေ အမြဲလိုလိုပြုလုပ်ခဲပြီး ကျေးရွာတွေနဲ့ လယ်ယာဥယျာဉ်ခြံမြေထဲကို လက်နက်ကြီးနဲ့ ပစ်ခတ်တာတွေလည်း လုပ်ဆောင်ခဲ့သေးတာ ဖြစ်ပါတယ်။
Public Service Announcement
ကေအဲန်ယူ သထုံခရိုင် ဘားအံမြို့နယ် တပ်မဟာ ၁ နယ်မြေအတွင်းက ကျေးရွာအချို့မှာ စစ်ကောင်စီတပ်နဲ့ BGF ပူးပေါင်းတပ်တွေက ဒေသခံရွာသားတွေကို အတင်းအကြပ် အုပ်ချုပ်ရေးမှူးလုပ်ဆောင်ခိုင်းနေပြီး စခန်းတွေကို လာရောက်ကင်းစောင့်ဖို့ အမိန့်ပေးညွှန်ကြားထားတာတွေလည်း ရှိနေတယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
