ဘားအံမြို့မှာ ဒီကနေ့မနက် စစ်ကောင်စီတပ်ဖွဲ့တွေက ဆိုင်ကယ်တက်စီဂိတ်နဲ့ ကွမ်းယာဆိုင်၊ လက်ဘက်ရည်ဆိုင်တွေမှာ ထိုင်နေတဲ့ပြည်သူတွေရဲ့ ဖုန်းတွေကို စစ်ဆေးမေးမြန်းတာတွေ လုပ်ဆောင်နေတယ်လို့ ကြုံတွေ့နေရတဲ့ မြို့ခံတစ်ဦးက ပြောပါတယ်။
” ဇွဲကပင်ပလာရှေ့နားဝန်းကျင်တစ်ဝိုက်မှာ စစ်ကောင်စီရဲတွေက ကွမ်းယာဆိုင်တွေ လက်ဘက်ရည်ဆိုင် ဆိုင်ကယ်တက်စီဂိတ်တွေနဲ့ လမ်းဘေးမှာရပ်နေတဲ့ ပြည်သူတွေထံကနေ ဖုန်းတွေယူပြီး စစ်ဆေးနေတယ်။ နောက် သွားလာနေတဲ့ ကားဆိုင်ကယ်တွေကို တားစီးစစ်ဆေးနေတာကို တွေ့ရတယ်” လို့ မြို့ခံတစ်ဦးက ပြောပါတယ်။
ဘားအံမြို့အဝင် အထွက်နေရာတွေမှာ စစ်ကောင်စီတပ်ဖွဲ့တွေက ရှာဖွေစစ်ဆေးတာတွေ ပိုလုပ်ဆောင်လာနေပြီး အခုလိုစစ်ဆေးမှုတွေကြောင့် သွားလာနေတဲ့ ခရီးသွားပြည်သူတွေ စိတ်အနှောင့်အယှက်များစွာဖြစ်ရတယ်လို့ ခရီးသွားပြည်သူတွေရဲ့ ပြောကြားချက်အရ သိရပါတယ်။
