ချင်းပြည်နယ် ဟားခါးမြို့သို့လာသည့် စစ်ကောင်စီတပ်ကို လမ်းခရီး၌ ခုခံတိုက်ခိုက်မှုများပြုလုပ်ခဲ့ရာ တစ်ပတ်အတွင်း စစ်ကောင်စီတပ်ဖွဲ့ဝင် ၂၀ ကျော်သေဆုံးပြီး ၄၀ ကျော် ဒဏ်ရာရရှိနိုင်ကြောင်း ချင်းအမျိုးသားတပ်ဦး (CNF) ပြောရေးဆိုခွင့်ရှိသူ ဆလိုင်းထက်နီက ပြောကြားသည်။
စစ်ကောင်စီတပ်၏ သံချပ်ကာယာဉ်အပါအဝင် စစ်ကား ၅၀ ထက်မနည်းသည် ချင်းပြည်နယ်မြောက်ပိုင်း ဖလမ်းမြို့သို့ အောင်တိုဘာ ၁၂ရက်တွင်ရောက်ရှိပြီး အောက်တိုဘာ ၁၃ရက်တွင် ဟားခါးသို့ ဆက်လက် ထွက်ခွာလာရာ CNF၏ လက်နက်ကိုင်တပ် ချင်းအမျိုး သားတပ်မတော်(CNA)နှင့် ချင်းပြည်ကာကွယ်ရေးတပ်ဖွဲ့(CDF)တို့က ပူးပေါင်းတိုက်ခိုက်ခဲ့ခြင်းဖြစ်သည်။
တစ်ပတ်အတွင်း တိုက်ပွဲ ၁၀ကြိမ်ကျော်ဖြစ်ပွားခဲ့ပြီး စစ်ကောင်စီတပ်မှ ယာဉ် ၁၆စီးထက်မနည်းကို ဖျက်ဆီးနိုင်ခဲ့ကြောင်း၊ စစ်ကောင်စီတပ်ဖွဲ့ဝင် ၂၀မှ ၃၀ဦးအကြား သေဆုံးနိုင်ပြီး ဒဏ်ရာရသူ ၄၀ ကျော်ရှိနိုင်ကြောင်း CNF ပြောရေးဆိုခွင့်ရှိသူက ခန့်မှန်းပြောကြားသည်။ တိုက်ပွဲအတွင်း ချင်းလက်နက်ကိုင်ပူးပေါင်းတပ်မှ တစ်ဦးသာ ဒဏ်ရာရရှိခဲ့သည်ဟုဆိုသည်။
“အဲဒီလို ကျွန်တော်တို့ဘက်က အထိအခိုက်က တစ်ယောက်လောက် ရှိတယ်ဆိုတာ ယုံနိုင်စရာလားဆိုတဲ့ မေးခွန်းတွေရှိပါတယ်။ အဲဒီဟာနဲ့ပတ်သက်ပြီး ကျွန်တော်တို့ ချင်းပြည်နယ်က ကျွန်တော်တို့ တိုက်ပွဲဖော်တဲ့ပုံစံက ခြုံခိုတိုက်ပွဲ ပုံစံနဲ့ ကျ တိုက်တာ ဆိုတော့ ကျွန်တော်တို့ဘက်က အကုန် အကာအကွယ်တွေကြိုတင်ယူထားတာမျိုး နယ်မြေကျွမ်းကျင်တာမျိုးရှိတယ်ဆိုတော့ အထိအခိုက်က တော်တော်နည်းသွားတာဖြစ်တာပေါ့” ဟု ဆလိုင်းထက်နီက ပြောသည်။
Public Service Announcement
ဖလမ်း – ဟားခါးလမ်းသည် ၄၅မိုင်ခန့်သာ ကွာဝေးသော်လည်း စစ်ကောင်စီတပ်သည် တစ်ပတ်ကြာသည်အထိ ၎င်းတို့၏ ရည်မှန်းချက် ဟားခါးသို့မရောက်နိုင်ဘဲ ဖြစ်နေသည်။
လက်ရှိတွင်စစ်ကောင်စီတပ်သည် တဖြည်းဖြည်းချင်း ရှေ့ဆက်တိုးနေရာ CNA/CDF ပူးပေါင်းတပ်က ကြားဖြတ်တိုက်ခိုက်မှုများ ဆက်လက်လုပ်ဆောင်နေသည်ဟုဆိုသည်။
