မင်းတပ်မြို့နယ် ချင်းပြည်ကာကွယ်ရေးတပ်ဖွဲ့(CDF) အနေဖြင့် မင်းတပ်မြို့တွင်း ပြောက်ကျားစစ်ဆင်နွှဲခဲ့ရာ စစ်ကောင်စီတပ်ဖွဲ့ဝင် နှစ်ဦးသေ၊ လေးဦးဒဏ်ရာရရှိခဲ့သည်ဟု CDFက ထုတ်ပြန်သည်။
အောက်တိုဘာ ၁၉ရက် နံနက်ပိုင်းတွင် မင်းတပ်ခရိုင်ထွေအုပ်ရုံးကို အင်နာကာဗုံးသီး၊သေနတ်များဖြင့် တိုက်ခိုက်ခဲ့ပြီး ညနေပိုင်းတွင် မြို့နယ်မီးသတ်ရုံး၌ တပ်စွဲထားသော စစ်ကောင်စီတပ်များကို ဝင်ရောက်တိုက် ခိုက်ခဲ့သည်ဟု ဆိုသည်။
CDF၏ ထုတ်ပြန်ချက်တွင် မင်းတပ်မှ မတူပီဘက်သို့ စစ်ကောင်စီတပ်များ အင်အားဖြည့်တင်းမှု အခြေအနေကိုလည်း ဖော်ပြသည်။
စစ်ကောင်စီတပ်သည် စစ်ကားအစီး ၇၀ ကျော်၊ သံချပ်ကာ ကားနှစ်စီးဖြင့် အောက်တိုဘာ ၁၄ ရက်မှစ၍ မတူပီသို့ ထွက်ခွာသွားရာ အောက်တိုဘာ၁၉ရက်တွင် မိုင်တိုင် ၂၃ တွင် ညအိပ်ရပ်နားပြီး ပြည်သူများ၏ အိုးအိမ်များဖျက်ဆီးခဲ့ကြောင်း၊ ဆိုလာပြားများဖြုတ်ယူခြင်း၊ အိုးခွက်ပန်းကန်များ ခိုးယူခြင်းပြုလုပ်ခဲ့ကြသည်ဟု ထုတ်ပြန်ခဲ့သည်။
Public Service Announcement
ထို့ပြင် ဒေသခံများ၏ နွားနောက်ခြောက်ကောင်ကို သတ်ခဲ့ပြီး ပေါင်သားများသာလှီးယူကာ ကျန်သည်တို့ကို ပစ်ထားခဲ့ကြောင်း ဖော်ပြထားသည်။
စစ်ကောင်စီတပ်သည် ချင်းပြည်နယ်တောင်ပိုင်း မတူပီ ဗျူဟာနှင့် မြောက်ပိုင်းဟားခါးဗျူဟာသို့ စစ်အင်အားများဖြည့်တင်းနေရာ CDFနှင့် ချင်းအမျိုးသားတပ်ဦး (CNF)တို့က ခုခံတိုက်ခိုက်လျက်ရှိသည်။
