မြန်မာစစ်ကောင်စီရဲ့ ပြည်ပငွေကြေးရရှိမှုတွေကို ထိန်းချုပ်ဖို့နည်းလမ်းတွေနဲ့ပတ်သက်လို့ စင်ကာပူ ငွေကြေးအာဏာပိုင်အဖွဲ့ ဒုတိယအကြီးအကဲနဲ့ဆွေးနွေးခဲ့တယ်လို့ အမေရိကန်နိုင်ငံခြားရေးဝန်ကြီးဌာန အတိုင် ပင်ခံ Derek Chollet ကပြောပါတယ်။
စင်ကာပူကို ရောက်ရှိနေတဲ့ အမေရိကန်နိုင်ငံခြားရေးဝန်ကြီးဌာနရဲ့ အတိုင်ပင်ခံပုဂ္ဂိုလ် Derek Chollet ဟာ မနေ့က နိုင်ငံခြားရေးဝန်ကြီး Vivian Balakrishnan ၊ ငွေကြေးအာဏာပိုင်အဖွဲ့ ဒုတိယအုပ်ချုပ်မှုဒါရိုက်တာ Ho Hern Shin တို့နဲ့သီးခြားစီတွေ့ဆုံခဲ့ပြီး မြန်မာ့အရေးကို ဆွေးနွေးခဲ့တာဖြစ်ပါတယ်။
စင်ကာပူနိုင်ငံခြားရေးဝန်ကြီး Vivian Balakrishnan နဲ့ Derek Chollet တို့ တွေ့ဆုံစဉ်မှာ မြန်မာစစ်တပ်အာဏာ ပိုင်တွေအနေနဲ့ အာဆီယံအထူးကိုယ်စားလှယ်နဲ့ပူးပေါင်းဆောင်ရွက်ဖို့၊ ဘုံဆုံးဖြတ်ချက် ၅ ရပ်ကို အမြန်ဆုံးအပြည့်အ၀အကောင်အထည်ဖော်ဖို့ ဆက်လက်တိုက်တွန်းကြောင်း သဘောတူခဲ့ပါတယ်။
နောက်ပြီး လာမယ့် အာဆီယံထိပ်သီးညီလာခံနဲ့ ဆက်စပ်အစည်းအဝေးတွေမှာ မြန်မာနိုင်ငံက နိုင်ငံရေးနဲ့မပတ်သက်သူကိုယ်စားလှယ်(non-political representative)ကို ဖိတ်ကြားဖို့ အာဆီယံရဲ့ ဆုံးဖြတ် ချက်ကို အမေရိကန်က ထောက်ခံအားပေးကြောင်း အတိုင်ပင်ခံပုဂ္ဂိုလ် Derek Chollet ဟာ ထပ်လောင်းပြောကြားပါတယ်။
Public Service Announcement
အတိုင်ပင်ခံ Derek Chollet ဦးဆောင်တဲ့ အမေရိကန်ထိပ်တန်းသံတမန်အဖွဲ့ဟာ မြန်မာ့အရေးအပါအဝင် ဒေသတွင်းမှာ အမေရိကန်ရဲ့ကတိကဝတ်တွေနဲ့ပတ်သက်လို့ အနီးကပ်တွေ့ဆုံဆွေးနွေးဖို့ ထိုင်း၊ စင်ကာပူနဲ့ အင်ဒိုနီးရှားနိုင်ငံတွေကို လာရောက်လည်ပတ်နေတာဖြစ်ပါတယ်။
