စစ်ကိုင်းတိုင်းအရာတော်မြို့နယ်ရှိ Local Ranger – LRG ဒေသခံကာကွယ်ရေးတပ်ဖွဲ့စခန်းကို အကြမ်းဖက်စစ်တပ်ကအင်အား ၂၀၀ခန့်ဖြင့် ယနေ့(အောက်တိုဘာ ၂၂ ရက်) နံနက် အစောပိုင်းတွင် ဝင်ရောက်စီးနင်းခဲ့ကြောင်း ဒေသခံများကပြောသည်။
“ဒီနေ့မနက်၄နာရီလောက်မှာ အကြမ်းဖက်စစ်ကောက်စီက ဒိုင်နာအိမ်စီးကား (၇) စီးခန့်ကိုအသုံးပြ၍ ညောင်ပင်ကန်ရွာလမ်းမှတဆင့် မီးတွေပိတ်ပြီး ဝင်လာကာ ရွာသားတချို့ဖမ်းဆီးသွားတယ်။ အဆိုပါအဖမ်းဆီခံရွာသားများကို PDFစခန်းတွေကိုလိုက်ပြခိုင်းတယ်”ဟု အရာတော်မြို့နယ်တော်လှန်ရေးအင်အားစု ARAမှ တာဝန်ရှိသူတစ်ဦးက ပြောသည်။
အရာတော်မြို့နယ် တောင်ဘက်ရှိ ကန်ရင်း၊ မလဲသာ၊ညောင်ပင်ကျေးရွာများသို့ အကြမ်းဖက်စစ်တပ်က အင်းအားအလုံးအရင်းဖြင့် ကနဦးဝင်ရောက်စီးနင်းခဲ့ပြီး အရာတော်မြို့နယ်တွင်းရှိ ရွာလမ်းမှ မဟုတ်ဘဲ မထင်မှတ်ထားသည့် မြင်းမူမြို့နယ်ဘက်မှတဆင့် ဝင်ရောက်ခဲ့ခြင်းဖြစ်ကြောင်း၎င်းက ဆက်ပြောသည်။
“ရဲဘော်တွေတော့ တစ်ယောက်မှ အထိအခိုက်မရှိဘဲ သတင်းကြိုရလို့ ရှောင်တိမ်နိုင်ခဲ့တယ်။ ရွာသားအချို့ကိုတော့ စစ်ခွေးတွေဖမ်းထားတယ်ကြားတယ်”ဟု ARA ၏ တာဝန်ရှိသူတစ်ဦးက ရှင်းပြသည်။ ထိုအပြင်စခန်းတဲကို မီးရှိုဖျက်ဆီးပြီး ၊သေနတ်များပစ်ဖောက်၍ ကန်ရင်းကျေးရွာမှပြည်သူများကို ခြိမ်းခြောက်၊ရွာကိုမွှေနှောက်၍ ပြည်သူအချို့ကိုဖမ်းဆီးထားကြောင်း အရာတော်မြို့နယ်သတင်းမှန်ပြန်ကြားရေးက ထုတ်ပြန်သည်။
Public Service Announcement
ထို့အပြင် Monywa Ranger တပ်စခန်းကိုလည်း ယနေ့မနက်တွင်ပင် ဝင်ရောက်စီးနင်းခြင်းခံရပြီး ပစ္စည်းအချို့ဖျက်ဆီးခံရကြောင်း သတင်းထွက်ပေါ်နေသော်လည်း People’s Springက သီးခြားအတည်မပြုနိုင်သေးပေ။
အောက်တိုဘာ ၁၃ ရက်ကလည်း မြောင်မြို့နယ် ပြည်သူ့ကာကွယ်ရေးတပ်ဖွဲ့ (မြောင် PDF) ပင်မစခန်းကို အကြမ်းဖက်စစ်ကောင်စီက လူအင်အား၊လက်နက်အင်အား အလုံးအရင်းဖြင့် ဝင်ရောက်စီးနင်းခဲ့သော် လည်း ပြည်သူ့ကာကွယ်ရေးတပ်ဖွဲ့ များက တိမ်းရှောင်နိုင်ခဲ့သဖြင့် ထိခိုက်ကျဆုံးမှု၊ဖမ်းဆီးခံရမှုမရှိခဲ့ပေ ။
အာဏာသိမ်းစစ်ကောင်စီတပ်က စစ်ကိုင်းတိုင်းအတွင်း ဒေသခံပြည်သူ့ကာကွယ်ရေးတပ် (LPDF)များကို ထိုးစစ်ဆင်နေမှုတွင် ကျေးရွာသူရွာသားများအား လူသားဒိုင်းသဖွယ် ဖမ်းဆီးခြင်း၊ နှိပ်စက်ခြင်း၊ ပြည်သူပိုင်ပစ္စည်းများကို လုယက်ခြင်း ၊ခိုးယူခြင်း ၊နေအိမ်များကို မီးရှို့မှုခြင်းစသဖြင့် ပြုလုပ်နေသည်။
