ဖလမ်းမြို့မှ ဟားခါးမြို့သို့ တပ်အင်အားများ ပို့ဆောင်ပြီးပြန်လာသည့် စစ်ကောင်စီတပ်ယာဉ်တန်းကို ဟားခါးမြို့ အထွက်တွင် ချင်းပြည်ကာကွယ်ရေးတပ်ဖွဲ့(CDF) နှင့် ချင်းအမျိုးသားတပ်ဦး(CNF/CNA)တို့ ပူးပေါင်း တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄ဦးသေဆုံးခဲ့သည်ဟု CNF ပြောရေးဆိုခွင့်ရှိသူ ဆလိုင်းထက်နီက ပြော သည်။
စစ်ကောင်စီတပ်သည် ချင်းမြောက်ပိုင်း ဟားခါးစစ်ဗျူဟာသို့ တပ်အင်အားနှင့် လက်နက်ခဲယမ်းများ ပို့ဆောင်လာသည့် ယာဉ်တန်းသည် အောက်တိုဘာ ၂၀ ရက်တွင် ဟားခါးမြို့သို့ ရောက်ရှိခဲ့သည်။
“မနေ့က ဖလမ်းကနေ ဟားခါးမြို့အဝင်နား ကျေးရွာတစ်ရွာနားမှာ တိုက်ပွဲငယ် တစ်ကြိမ်ဖြစ်တာပေါ့။ ဟားခါး ကို ယာဉ်တန်းသွားပို့ပြီး ပြန်လာတဲ့ ယာဉ်တန်းကို စစ်ကောင်စီစစ်တပ်ကို ပစ်တာပေါ့။ တိုက်ပွဲငယ်ပေါ့။ ဒီဘက်က ခြုံခိုပြီးတိုက်တာ။ သူတို့ဘက်က လေးယောက်လောက်ကျတယ်။ ဒဏ်ရာတော့ အများကြီးရတယ်။ ကျွန်တော်တို့ဘက်က ကြိုတင်အကာအကွယ်ယူထားတယ်ဆိုတော့ အထိအခိုက်မရှိပါဘူး”ဟု ဆလိုင်းထက်နီက ပြောသည်။
အဆိုပါ စစ်ကောင်စီတပ်ယာဉ်တန်းသည် ဟားခါးသို့ အလာတွင်လည်း ချင်းလက်နက်ကိုင်တပ်ဖွဲ့က ကြားဖြတ်တိုက်ခိုက်မှုများ လုပ်ဆောင်ခဲ့၍ မိုင် ၄၀ကျော်သာကွာဝေးသည့် ဖလမ်း – ဟာခါးလမ်းကို တစ်ပတ်ကျော်ကြာ ခရီးနှင့်ခဲ့ရသည်။
Public Service Announcement
အောက်တိုဘာ ၁၃ရက်မှ ၂၀ရက်အတွင်း တိုက်ပွဲ ၁၀ကြိမ်ထက်မနည်း ဖြစ်ပွားခဲ့ပြီး စစ်ကောင်စီတပ်သားများ သေဆုံးထိခိုက်ဒဏ်ရာရကာ စစ်ကားများလည်း ပျက်စီးခဲ့သည်ဟု CNF တာဝန်ရှိသူက ပြောသည်။
