မန္တလေးက မြရည်နန္ဒအိမ်ရာ အနီး ပေါက်ကွဲမှုကြောင့် စစ်သား၁ ဦးသေ၊ ၂ ဦးဒဏ်ရာရခဲ့တဲ့ ဖြစ်စဉ်အပြီးဒီနေ့ မနက်ပိုင်းမှာ အဲဒီအိမ်ရာကိုစစ်ကောင်စီတပ်ဖွဲ့ဝင်တွေ အင်အားအများအပြားနဲ့ပိတ်ဆို့ကာ တစ်ခန်းဝင်တစ်ခန်းထွက် ဝင်ရောက်ရှာဖွေစစ်ဆေးတာတွေပြုလုပ်နေပါတယ်။
မနေ့က ချမ်းမြသာစည်မြို့နယ် ၊ မြရည်နန္ဒာအိမ်ရာ အနီးက ဘောလုံးကွင်းထဲတပ်စွဲထားတဲ့ စစ်ကောင်စီ လုံခြုံရေးကင်းမှာပေါက်ကွဲမှုဖြစ်ကာ တပ်ကြပ် ၁ ဦးသေပြီး ကျန်တပ်ကြပ်၁ ဦးနဲ့ တပ်သား ၁ ဦး ကတော့ ဒဏ်ရာရသွားကြပါတယ်။
ဒီဖြစ်စဉ်နဲ့ပတ်သက်ပြီး မြရည်နန္ဒအိမ်ရာကို စစ်ကောင်စီတပ်ဖွဲ့ဝင်တွေ ဒီနေ့မနက်ပိုင်း ၁၀ နာရီလောက်က စတင်ကာဝင်မွှေကြတာပါ။
အိမ်ရာအဝင်အထွက်တွေကိုပိတ်လိုက်ပြီး တစ်ခန်းဝင်တစ်ခန်းထွက် ရှာဖွေစစ်ဆေးတာတွေလုပ်တယ်လို့ အဲဒီအိမ်ရာမှာနေသူတစ်ဦးကပြောပြပါတယ်။
Public Service Announcement
” အခုတိုက်ခန်းတိုင်းကိုစစ်နေတာ ၊အိမ်ရှင်လား အိမ်ဌားလားမေးတယ် ၊ ဧည့်စာရင်းစစ်တယ် ၊ အိမ်ထောင်စုရှိတဲ့သူတော့အိမ်ထောင်စုဇယားနဲ့ မှတ်ပုံတင်ပဲပြရတယ် ၊ အခန်းထဲထိ ဝင်စစ်တာတော့မလုပ်သွားဘူး ၊ကပ်လျက်အခန်းတွေတော့အတွင်းထဲထိဝင်စစ်သွားတယ်လို့ ” အိမ်ရာမှာနေသူအမျိုးသမီးတစ်ဦးကပြောပါတယ်။
မွန်းလွဲပိုင်း ၂ နာရီလောက်ထိ စစ်ကောင်စီတပ်ဖွဲ့ဝင်တွေဟာ အခန်းတွေကို လိုက်လံစစ်ဆေးနေသလို အိမ်ရာဝင်းထဲမှာ ကင်းလှည့်နေကြတာတွေ့ရပါတယ်။
ဒါအပြင် အိမ်ရာဝင်း ကိုဝင်ထွက်သွားလာတာတွေ ကိုတားမြစ်ထားပါသေးတယ်။
