မနက်ဖြန်(အောက်တိုဘာ၂၆)စတင်မယ့် အာဆီယံထိပ်သီးညီလာခံမှာ မြန်မာအာဏာသိမ်းခေါင်းဆောင်မင်းအောင်လှိုင်ကို တက်ရောက်ခွင့်ပြုမှာမဟုတ်ဘဲ စစ်ကောင်စီလက်အောက်ခံနိုင်ငံခြားရေးဝန်ကြီးဌာနရဲ့ အမြဲတမ်းအတွင်းဝန်ဦးချမ်းအေးကို ဖိတ်ကြားထားတယ်လို့ APသတင်းတစ်ရပ်မှာ ဖော်ပြပါတယ်။
အွန်လိုင်းကကျင်းပမယ့် အာဆီယံထိပ်သီးညီလာခံကို နိုင်ငံရေးနဲ့မပတ်သက်တဲ့ကိုယ်စားလှယ် (non-political representative)ကိုသာ ဖိတ်ကြားသွားမယ်လို့ အာဆီယံကဆုံးဖြတ်ခဲ့ပြီး အဲဒီ ကိုယ်စားလှယ်ဟာ ဦးချမ်းအေးဖြစ်ကြောင်းနဲ့ တက်ရောက်ဖြစ်၊ မဖြစ်ကိုမရှင်းသေးကြောင်း APသတင်းဌာက ရေးသားပါတယ်။
အောက်တိုဘာ ၂၆ ကနေ ၂၈ အထိ သုံးရက်ကြာပြုလုပ်မယ့် အာဆီယံထိပ်သီးညီလာခံနဲ့ ဆက်စပ်အစည်း အဝေးတွေကို အမေရိကန်သမ္မတ ဂျိုးဘိုင်ဒင်နဲ့ တရုတ်နဲ့ ရုရှားက ခေါင်းဆောင်တွေလည်း တက်ရောက်ကြမယ်လို့ ဆိုပါတယ်။
အကြမ်းဖက်စစ်ကောင်စီလက်အောက်ခံ နိုင်ငံခြားရေးဝန်ကြီးဌာနကတော့ မင်းအောင်လှိုင်ကို တက်ရောက်ခွင့်မပေးတဲ့အပေါ် အပြင်းအထန်ကန့်ကွက်ထားပါတယ်။
တစ်ဖက်မှာလည်း အမျိုးသားညီညွတ်ရေးအစိုးရ NUG က အာဆီယံရဲ့ Non-political representative ဖိတ်ကြားမယ့်အပေါ် ထောက်ခံကြိုဆိုထားပြီး စစ်ကောင်စီနဲ့ပတ်သက်တဲ့ လူပုဂ္ဂိုလ်၊ အဖွဲ့အစည်းကို မဖိတ်ကြားဖို့ တောင်းဆိုတိုက်တွန်းထားပါတယ်။