ချင်းပြည်နယ် မြောက်ပိုင်းကို သွားရောက်သည့် အဓိက လမ်းမကြီးနှစ်ခုကို ညဘက်ခရီးမသွားရန် ချင်းပြည်နယ်နှင့်ကလေးမြို့နယ် ဒေသခံကာကွယ်ရေးတပ်ဖွဲ့များက သတိပေးထုတ်ပြန်လိုက်သည်။
စစ်ကိုင်းတိုင်း ကလေးမြို့မှ ချင်းပြည်နယ် တီးတိန်းနှင့်ဖလမ်းမြို့များကို ဆက်သွယ်ထားသည့် ကလေး- သိုင်းငင်းလမ်းပိုင်းနှင့် ကလေး- ဂန့်ဂေါလမ်းမကြီးနှစ်ခုကို အောက်တိုဘာ ၂၆ ရက်မှ ၃၁ ရက်အထိ ညနေ ၆ နာရီမှ နံနက် ၆နာရီကြား ခရီးမသွားကြရန် ဒေသခံကာကွယ် ရေးတပ်ဖွဲ့များက သတိပေးထားခြင်းဖြစ်သည်။
လက်ရှိဖြစ်ပေါ်နေသော စစ်ရေးအခြေအနေများအရ ယခုလိုကန့်သတ်ရခြင်းဖြစ်သည်ဟု ဒေသခံကာကွယ် ရေးတပ်ဖွဲ့ဖြစ်သည့် CDF(ကလေး-ကဘော်- ဂန့်ဂေါ) ကထုတ်ပြန်ထားသည်။ ထိုလမ်းပိုင်းများတွင် အချိန်မရွှေးဖြစ်ပေါ်နိုင်သော အာဏာရှင် သုတ်သင်ရေးတိုက်ပွဲများကြောင့် မှားယွင်းဖောက်ခွဲခံရနိုင်၍ ကြေငြာချက်ကို အထူးအလေးနက်ထားပေးပါရန် ဒေသခံကာကွယ်ရေးတပ်ဖွဲ့များက သတိပေးထားသည်။
ထို့အပြင် ကလေးမြို့နှင့် ချင်းတောင်ကြား အောက်တိုဘာ ၂၅ ရက်စတင်ပြီး ခရီးသွားလာခြင်းမပြုရန်လည်း ဒေသခံကာကွယ်ရေးတပ်ဖွဲ့တစ်ခုဖြစ်သည့် ပြည်သူ့ကာကွယ်ရေးတပ်မတော်(ဇိုမီး) အဖွဲ့က သတိပေးထားသည်။
Public Service Announcement
ဒေသခံကာကွယ်ရေးတပ်ဖွဲ့ တစ်ခုဖြစ်သည့် ပြည်သူ့ကာကွယ်ရေးတပ်ဖွဲ့(ကလေး)ကလည်း ကလေး-ဂန့်ဂေါလမ်းပိုင်းကို အောက်တိုဘာ ၂၂ ရက်စတင်ပြီး ခရီးသွားလာခြင်းမပြုရန် တားမြစ်ထားသည်။
“PDFတွေရဲ့ တားမြစ်ချက်ကိုတွေ အလေးထားဖို့လိုတယ်လိုထင်တယ်။ ဖြစ်သွားရင် PDFတွေကော၊ ခံရတဲ့သူတွေအတွက်ကော နှစ်ဖက်လုံးမကောင်းဘူး။ ”ဟု ကလေးမြို့ခံတစ်ဦးက ပြောသည်။
တားမြစ်ချင်ကို မလိုက်နာသော High Class မှန်လုံတစ်စီးသည် အောက်တိုဘာ ၂၃ ရက်တွင် ကလေး-ဂန့်ဂေါလမ်းပိုင်းတွင် မိုင်း ၆လုံးဖောက်ခွဲခံရပြီး လူလေးဦးထိခိုက်ဒဏ်ရာရခဲ့သည်။ အောက်တိုဘာ ၂၅ ရက်တွင်လည်း ကလေး-ဂန့်ဂေါလမ်းပိုင်း ကလေးမြို့နယ် စည်သာကျေးရွာနှင့်နတ်မြောင်းကျေးရွာအကြား ကားတစ်စီး မိုင်းဗုံးထိမှန်ပေါက်ကွဲခဲ့ပြီး ကားမောင်းသမားထိခိုက်ဒဏ်ရာရခဲ့သည်။
အောက်တိုဘာ ၂၃ ရက်တွင် အကြမ်းဖက်စစ်ကောင်စီတပ်သားများက အိမ်စီးကားများကို အသုံးပြုပြီး ကလေး-ဂန့်ဂေါလမ်းကို အသုံးပြုခဲ့၍ သွားလာနေမူကို ဒေသခံကာကွယ်ရေးတပ်ဖွဲ့များက တိုက်ခိုက်ခဲ့သည်။
ထိုတိုက်ခိုက်မူကြောင့် အဆိုပါကားမှာ ချောက်ထဲပြုတ်ကျသွားခဲ့သည်ဟု ဒေသခံကာကွယ်ရေးတပ်ဖွဲ့များက သတင်းထုတ်ပြန်ထားသည်။
