မုံရွာမြို့တွင် ကေတီဗီမှ ပြန်လာသည့် အာဏာသိမ်းစစ်ကောင်စီ၏ဒုရဲအုပ်တစ်ဦးနှင့်ရဲတပ်သားတစ်ဦးတို့ယနေ့(အောက်တိုဘာ၂၆) နံနက်အစောပိုင်းတွင် တော်လှန်ရေးအဖွဲ့တစ်ဖွဲ့က ပစ်သတ်၍ သေဆုံးသွားကြောင်း မုံရွာမြို့ ဒေသခံများက ပြောသည်။
ယနေ့ နံနက်၄နာရီဝန်းကျင်ခန့်က KTVကပြန်လာသည့်ဒုရဲအုပ် ဝင်းကျော်မျိုးနှင့်ရဲတပ်သားတစ်ဦးတို့ကို SIAတပ်ဖွဲ့များက စက်မှုဇုန်ရပ်ကွက် စွယ်တော်လမ်းအရောက်၌ ဆည်းကြိုတိုက်ခိုက်ခဲ့ခြင်းဖြစ်ကြောင်း SIAအဖွဲ့တာဝန်ရှိသူများက ဒေသတွင်းသတင်းများဖော်ပြပေးနေသော RNAကို အတည်ပြုထားသည်။
“တစ်ယောက် ကို ခုနှစ်ချက် နဲ့ အနီးကပ် ပစ်သတ်သွားတယ်။ပြီးတော့ သေနတ် နှစ်လက်ပါ ယူသွားတယ်လို့ ပြောတယ်”ဟု မုံရွာ မြို့နေသူတစ်ဦးက ပြောသည်။
အဆိုပါ ဒုရဲအုပ် နှစ်ဦးကို ပျောက်ကြားတော်လှန်ရေးအဖွဲ့ SIA မှ တိုက်ခိုက်ခဲ့ခြင်းဖြစ်ပြီး လက်နက်နှင့် ကျည်ဆံများပါ သိမ်းဆည်းနိုင်ခဲ့သည်ဟု ယနေ့ နံနက်ပိုင်းတွင်ဓါတ်ပုံနှင့်တကွ ကြေညာသည်။
Public Service Announcement
“ဟုတ်တယ်ဗျ၊မနက်က ၄နာရီကျော်လောက်ပေါ့နော်၊သူတို့က KTVကပြန်လာတာ၊ကျွန်တော်တို့က လမ်းမှာစောင့်နေတာ၊သူတို့လဲတွေ့ရော တိုက်ခိုက်တာပေါ့ဗျာ၊ဒုရဲအုပ်အပါအဝင်ရဲတပ်သားတစ်ဦး အဲ့နေရာမှာ ပွဲချင်းပြီးသေတယ်၊သူတို့ပါလာတဲ့သေနတ်နဲ့ကျည်ဆံတွေကိုလည်း သိမ်းယူနိုင်ခဲ့တယ်၊ ကျနော်တို့အဖွဲ့ကတော့ တစ်ယောက်မှ ထိခိုက်မှုမရှိဘူး”ဟု ဗိုလ်ခွန်ဆာက ပြောကြားသည်။
SIAအဖွဲ့မှ ဗိုလ်ခွန်ဆာဦးဆောင်ပြီး ဂျောင်းဖော့ဘရန်ဆန်နှင့်ရဲဘော်သုံးဦးဆည်းကြိုတိုက်ခိုက်မှုကြောင့် ဒုရဲအုပ်ဝင်းကျော်မျိုးနှင့်ရဲတပ်သားတစ်ဦးတို့မှာနေရာမှာတွင်ပွဲချင်းပြီးသေဆုံးခဲ့သည်။ သေဆုံးသူနှစ်ဦး၏ အလောင်းကို စစ်ကောင်စီတပ်က နံနက် ၆ နာရီဝန်းကျင်တွင်လာရောင်သယ်ဆောင်ခဲ့သည်။
ထို့အပြင် အောက်တိုဘာ၂၅ရက် ည၁၁နာရီခန့်က ပစ်ခတ်မှုဖြစ်ပွားခဲ့ပြီး ဒေသခံလေးဦးလည်း ဖမ်းဆီးခံရကြောင်း သိရသည်။
လက်ရှိတွင် မုံရွာမြို့အဝင်အထွက် ဂိတ်များကို စစ်ကောင်စီက တားဆီးပိတ်ဆို့မှုများပြုလုပ်နေသည့် အပြင် အကြမ်းဖက်စစ်ကောင်စီ၏ ရဟတ်ယာဥ်များလည်း မြို့ပေါ် ၌ ပျံဝဲနေကြောင်းဒေသခံများက ဆိုသည်။
