ညမထွက်ရအမိန့် ထုတ်ထားတဲ့ မန္တလေးမှာ မနေ့က အောက်တိုဘာလ ၂၇ ရက် ည ၁၂ နာရီလောက်က NLD တိုင်းရုံး ဖောက်ခွဲ ဖျက်ဆီးခံခဲ့ရပါတယ်။
ချမ်းအေးသာစံမြို့နယ် ၆၂လမ်း ၊ ၃၃လမ်းနဲ့ ၃၄လမ်းကြားရှိ မန္တလေးတိုင်း အမျိုးသားဒီမိုကရေစီအဖွဲ့ချုပ်ပါတီရုံးရဲ့ တတိယထပ်နဲ့ စတုတ္ထထပ်တို့မှာ ပေါက်ကွဲမှုဖြစ်ခဲ့တာလို့ အဲဒီရပ်ကွက်မှာနေကြသူတွေကပြောပြပါတယ်။
“ည၁၂နာရီလောက်ကကွဲတာ ။ ဘေးအိမ်တွေပါ မှန်တွေအကုန်ကွဲကုန်တာ ။ပေါက်ကွဲအားကတော်တော်ပြင်းတယ်။ လမ်းမပေါ်မှာတင်ကို ပျက်စီးတာတွေရှိခဲ့တယ် ။ အခုမနက်တော့ရှင်းပြီးသွားပြီ” လို့ NLDတိုင်းရုံးတည်ရှိရာ မြင်းတန်းရပ်ကွက်တွင် နေထိုင်သူတစ်ဦးကပြောပါတယ် ။
ဖောက်ခွဲဖျက်ဆီးခံရတဲ့ NLD တိုင်းရုံးဟာ စစ်ကောင်စီက အာဏာသိမ်းပြီး ချိတ်ပိတ်ထားတဲ့အဆောက်အအုံလည်းဖြစ်ပါတယ်။
Public Service Announcement
ဒါအပြင် အဲဒီရုံးကို စစ်ကောင်စီတပ်ဖွဲ့ဝင်တွေက အရပ်ဝတ်များနဲ့ စောင့်ကြည့်တာတွေပြုလုပ်နေတာလည်းရှိပါတယ်။
ပေါက်ကွဲမှုကြောင့် NLD တိုင်းရုံးရဲ့ရှေ့မျက်နှာစာမှာ ပျက်စီးမှုတွေရှိခဲ့ပြီး ဒုတိယထပ်၊ တတိယထပ်နဲ့ စတုတ္ထထပ်နံရံတွေ ပျက်စီးသွားတာတွေ့ရပါတယ်။
ပြီးခဲ့တဲ့ ရက်ပိုင်းတွေကလည်း ထားဝယ်မှာရှိတဲ့ NLD တိုင်းရုံး ဖောက်ခွဲဖျက်ဆီးခံရပြီး ၂ ထပ်အဆောက်အအုံဟာ ပြိုကျပျက်စီးခဲ့တာရှိပါတယ်။
