ရှမ်းပြည်နယ်တောင်ပိုင်း ဖယ်ခုံမြို့နယ် ရွှေပြည်အေးရွာမှ ရွာသားများကို စစ်ကောင်စီတပ်က ဖမ်းဆီးပြီး လူသားဒိုင်းကာအဖြစ် ခေါ်ဆောင်ထားကြောင်း ကရင်နီအမျိုး သားကာကွယ်ရေးတပ်ဖွဲ့(KNDF) ဖယ်ခုံဇုန်က ဓာတ်ပုံနှင့်တကွ ထုတ်ပြန်သည်။
KNDF ဖယ်ခုံဇုန်က ထုတ်ပြန်သည့် ဓာတ်ပုံထဲတွင် သက်ကြီးရွယ်အိုအပါအဝင် အရပ်သား ၁၂ဦးထက်မနည်းကို တန်းစီပြီး ကြိုးချည်ကာ မျက်နှာအဝတ်စည်း ခေါ်ဆောင်သွားသည်ကို တွေ့ရသည်။
စစ်ကောင်စီတပ်အနေဖြင့် ကျေးရွာအတွင်းရှိ ပြည်သူမျး၏ နေအိမ်များကို ဖောက်ထွင်းပြီးပစ္စည်းများ ဖျက်ဆီးခြင်း၊ ငွေကြေးများယူဆောင်ခြင်းအပါအဝင် ပြည်သူများအပေါ် မတရားအနိုင်ကျင့်နေကြောင်း ဖော်ပြထားသည်။
ယခင်ကလည်း ဖယ်ခုံမြို့နယ်အတွင်း တိုက်ပွဲဖြစ်ပွားစဉ် ဒေသခံများကို စစ်ကောင်စီတပ်က ဖမ်းဆီးပြီး လူသားဒိုင်းအဖြစ် အသုံးပြုခဲ့ခြင်းများရှိခဲ့သည်။
Public Service Announcement
ပြီးခဲ့သည့်ရက်ပိုင်းအတွင်းကလည်း စစ်ကောင်စီတပ်က လက်နက်ကြီးများဖြင့် ရမ်းသမ်းပစ်ခတ်ခဲ့၍ ရွှေပြည်အေးရွာမှ နေအိမ် ငါးလုံးနှင့် ဆေးခန်းတို့ ထိခိုက်ပျက်စီးခဲ့ပြီး ရွာသူရွာသား ၃၅၀ကျော် ထွက်ပြေးတိမ်းရှောင်ခဲ့ကြရသည်။
