အမေရိကန်သံအမတ်ဟောင်းဘီလ်ရစ်ချက်ဆန်ဟာ ကိုဗစ်ကပ်ဘေးကူညီထောက်ပံ့ရေးကို အဓိကထားမယ့် ပုဂ္ဂလိကလူသားချင်းစာနာမှု မစ်ရှင်တစ်ခုအတွက် မြန်မာနိုင်ငံကို သွားရောက်မယ်လို့ ၎င်းရဲ့ပြောရေးဆိုခွင့် ရှိသူက မနေ့က(အောက်တိုဘာ ၃၁ ရက်)က ပြောပါတယ်။
ဘီလ်ရစ်ချက်ဆန်စင်တာဟာ မြန်မာပြည်သူတွေကို ကူညီထောက်ပံ့ရာမှာ ရှည်လျားတဲ့သမိုင်း ကြောင်းရှိခဲ့တယ်လို့ပြောပေမယ့် သူ့ခရီးစဉ်ထုတ်ပြန်ချက်မှာ အာဏာသိမ်းမှုကို ဖော်ပြမထားဘဲ မြန်မာနိုင်ငံမှာ ဘယ်သူတွေနဲ့တွေ့ဆုံဖို့ စီစဉ်ထားတယ်ဆိုတာလည်းအသေးစိတ်မပါရှိဘူးလို့ AP သတင်းဌာနကဆိုပါတယ်။
“မြန်မာနိုင်ငံမှာရှိတဲ့ ကျွန်တော်တို့အဆက်အသွယ်တွေနဲ့ ပူးပေါင်းဆောင်ရွက်ရာမှာ COVID-19 ကာကွယ်ဆေးတွေ၊ ဆေးဘက်ဆိုင်ရာအကူအညီတွေနဲ့ အခြားသော အများပြည်သူ ကျန်းမာ ရေးလိုအပ်ချက်တွေရဲ့ လူသားချင်းစာနာမှုပေးရေးအတွက် လမ်းကြောင်းတွေ ဆွေးနွေးဖို့ သွား ရောက်တာဖြစ်ပါတယ်” လို့ ရစ်ချက်ဆန်က ထုတ်ပြန်ချက်မှာ ဖော်ပြပါတယ်။
ဘီလ်ရစ်ချက်ဆန်ရဲ့ မြန်မာနိုင်ငံသွားရောက်မယ့်မစ်ရှင်ကို ကုလသမဂ္ဂအထွေထွေအတွင်းရေးမှူးချုပ် အန်တိုနီယိုဂူတာရက်စ် သိရှိထားတယ်လို့ ရစ်ချက်ဆန်ရဲ့ပြောရေးဆိုခွင့်ရှိသူ Madeleine Mahony က ပြောပါတယ်။
Public Service Announcement
အမေရိကန်နိုင်ငံခြားဝန်ကြီးဌာနကတော့ ခရီးစဉ်နဲ့ပတ်သက်လို့ ချက်ချင်းတုံ့ပြန်တာမရှိသေးပါဘူး။
အမေရိကန်သံတမန်နဲ့ နယူးမက္ကစီကို အုပ်ချုပ်ရေးမှူးဟောင်း ဘီလ်ချက်ဆန်ဟာ ပြီးခဲ့တဲ့ NLD အစိုးရလက်ထက် ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည်ဖော်ဆောင်ရွက် ရေးကော်မတီရဲ့ အကြံပေးအဖွဲ့စတင်ဖွဲ့စည်းချိန်မှာ အဖွဲ့ဝင်အဖြစ် ပါဝင်ခဲ့ပါတယ်။
ဒါပေမဲ့ အဲဒီအကြံပေးအဖွဲ့ရဲ့ ၂၀၁၈ ဩဂုတ် မြန်မာနိုင်ငံခရီးစဉ်အပြီးမှာ ဘီလ်ချက်ဆန်ကို အဖွဲ့ ဝင်တာဝန်ကနေ ရပ်စဲကြောင်း NLD အစိုးရက ထုတ်ပြန်ခဲ့ပါတယ်။
