ထန်တလန်ဖြစ်စဉ်ဟာ မြန်မာစစ်တပ်ထံ လက်နက်စီးဆင်းမှုကို ကုလသမဂ္ဂလုံခြုံရေးကောင်စီက ပိတ်ပင်တားဆီးဖို့ နောက်ထပ်အကြောင်းပြချက်ဖြစ်တယ်လို့ လူ့အခွင့်အရေးဆိုင်ရာ အထူးအစီရင်ခံစာတင်သွင်းသူ Tom Andrews က ပြောပါတယ်။
ချင်းပြည်နယ်မှာ လက်နက်ကြီးနဲ့ တပ်အမြောက်အများနေရာချထားပြီးနောက် ထန်တလန်မြို့ကို မီးတင်ရှို့မှုဟာ မြန်မာပြည်သူတွေကို သတ်ဖြတ်ဖို့ စစ်ကောင်စီ လိုအပ်နေတဲ့ ဝင်ငွေတွေနဲ့ လက်နက်စီးဆင်းမှုကို ကုလလုံခြုံရေးကောင်စီက ချက်ချင်းအရေးယူ၊ ရပ်တန့်ဖို့ နောက်ထပ် အကြောင်းပြချက်ဖြစ်တယ်လို့ Tom Andrews က တွစ်တာမှာ ရေးသားဖော်ပြပါတယ်။
ကုလသမဂ္ဂအထွေထွေညီလာခံဟာ ပြီးခဲ့တဲ့ ဇွန်လက မြန်မာနိုင်ငံကို လက်နက်ရောင်းချမှုပိတ်ပင်ရေးအဆိုကို ဆုံးဖြတ်အတည်ပြုခဲ့ပါတယ်။
ဒါပေမဲ့ အထွေထွေညီလာခံရဲ့ဆုံးဖြတ်ချက်ဟာ ဥပဒေအရစည်းနှောင်မှုမရှိဘဲ လုံခြုံရေးကောင်စီရဲ့ဆုံးဖြတ် ချက်ကသာ စည်းနှောင်မှုရှိပြီး အဖွဲ့ဝင်နိုင်ငံအားလုံးက လိုက်နာဆောင်ရွက်ရတာဖြစ် တာကြောင့် လုံခြုံရေးကောင်စီက ဆုံးဖြတ်ချမှတ်ဖို့ Tom Andrews အပါ အဝင် ပြည်တွင်း၊ ပြည်ပအဖွဲ့အစည်းတွေက တောင်းဆိုတိုက်တွန်းနေတာဖြစ်ပါတယ်။
Public Service Announcement
ပြီးခဲ့တဲ့ အောက်တိုဘာ ၂၉ ရက်က ချင်းပြည်နယ် ထန်တလန်မြို့မှာ အကြမ်းဖက်စစ်တပ်ရဲ့ လက်နက်ကြီးတွေနဲ့ပစ်ခတ်မှုကြောင့် ခရစ်ယာန်ဘုရားကျောင်းနှစ် ကျောင်းအပါအဝင် လူနေအိမ် ၁၆၀ကျော် မီးလောင်ကျွမ်းခဲ့ပါတယ်။
