မင်းတပ်-မတူပီလမ်းပိုင်းတွင် နိုဝင်ဘာ ၄ ရက်၌ အကြမ်းဖက်စစ်ကောင်စီတပ်ကို ချင်းဒေသကာကွယ်ရေးတပ်ဖွဲ့ -CDF (မင်းတပ်)က နှစ်ကြိမ်တိုက်ခိုက်မူကြောင့် စစ်ကောင်စီတပ်သား ၂၅ ဦးသေဆုံးကြောင်းCDF-မင်းတပ်က ယနေ့(နိုဝင်ဘာ ၅ရက်)သတင်းထုတ်ပြန်သည်။
နိုဝင်ဘာ၄ရက်တွင် မင်းတပ်မြို့အနောက်ဘက် မင်းတပ်-မတူပီလမ်းပိုင် မိုင်တိုင် ၆ နှင့် မိုင်တိုင် ၄၃ တို့တွင် ဒေသခံကာကွယ်ရေးတပ်ဖွဲ့က အကြမ်းဖက်စစ်ကောင်စီယာဉ်တန်းကို တိုက်ခိုက်ခဲ့သည်။ မိုင်တိုင် ၆တွင် အကြမ်းဖက်စစ်တပ်က မနက် ၈နာရီခွဲတွင် စစ်ကြောင်းထိုးလာသဖြင့် CDF-မင်းတပ်နှင့်တိုက်ပွဲဖြစ်ပွားခဲ့ခြင်းဖြစ်သည်။ထိုတိုက်ပွဲတွင် CDF(မင်းတပ်)၏ ပဒေသာမိုင်းကြောင့် အကြမ်းဖက်စစ်သား ၅ ဦးသေဆုံးခဲ့ပြီး ဒဏ်ရာရသူများလည်းရှိသည်ဟု CDF(မင်းတပ်)ထုတ်ပြန်ချက်တွင်ဖော်ပြထားသည်။
ထို့အပြင်မိုင်တိုင် ၄၃တွင် သံချပ်ကားပါသည့် အကြမ်းဖက်စစ်ကောင်စီတပ်ယာဉ်တန်းကို CDF(မင်းတပ်)က ရှေ့နောက် ညှပ်တိုက်ခဲ့ရာ အကြမ်းဖက်စစ်သား ၂၀ခန့်သေဆုံးခဲ့သည်ဟု CDF (မင်းတပ်)ကထုတ်ပြန်သည်။ တိုက်ပွဲအတွင်း အကြမ်းဖက်စစ်ကောင်စီတပ်ယာဉ်တန်း၏ နောက်ဆုံးကားက မောင်းပြေးသဖြင့် ကားအောက်တွင် ဝပ်၍နေရာယူထားသော အကြမ်းဖက်စစ်သားများ ကားနောက်အမှီပြေးလိုက်ချိန်တွင် CDF တပ်ဖွဲ့ဝင်များကဝိုင်းပစ်ခတ်ခဲ့၍ အကျအဆုံးများရခြင်းဖြစ်သည်ဟု ထုတ်ပြန်ချက်တွင်အသေးစိတ်ဖော်ပြထားသည်။
နိုဝင်ဘာ ၃ ရက်တွင်လည်း အကြမ်းဖက်စစ်တပ်၏ စစ်ကား ၇၅ စီးပါသော ယာဉ်တန်းကို CDF(မင်းတပ်)က တိုက်ခိုက်ခဲ့ပြီး အကြမ်းဖက်စစ်သား ၁၀ ဦးသေဆုံးသေးသည်။ထိုတိုက်ပွဲတွင်အသက် ၇၃ နှစ်အရွယ် ပညာရေးဝန်ထမ်းအငြိမ်းစား CDFတပ်ဖွဲ့ဝင်တစ်ဦးကျဆုံးခဲ့ပြီး၊ ၃ ဦးဒဏ်ရာရရှိခဲ့သည်။