မန္တလေးမြို့ အောင်မြေသာစံမြို့နယ်မှာနေထိုင်တဲ့ မြင့်မြင့်ခင် ထိုးမုန့်ဆိုင်တွေရဲ့ ပိုင်ရှင် နေအိမ်ကို နိုဝင်ဘာ ၅ ညပိုင်းက စစ်ကောင်စီတပ်တွေ ဝင်ရောက်စီးနင်းခဲ့ပါတယ်။
မနေ့ညပိုင်းက နေအိမ်ခြံဝင်းအတွင်းနဲ့ ခြံဝင်းပြင်ပတွေမှာ စစ်ကောင်စီတပ်ဖွဲ့ဝင်တွေ ရောက်ရှိလာပြီး လူ ၄ ဦးခန့်ကိုဖမ်းဆီးသွားခဲ့တယ်လို့ မြင့်မြင့်ခင်မိသားစုနဲ့နီးစပ်သူတစ်ဦးထံကနေစုံစမ်းသိရပါတယ်။
“ဖမ်းသွားတာလူ ၄ ယောက်လောက်ရှိတယ်လို့ပြောတယ်။ အခုထိတော့အဆက်အသွယ်မရသေးဘူး၊ဘာကြောင့်ဖမ်းတယ်ဆိုတာလည်းမသိဘူး” လို့ နီးစပ်သူတစ်ဦးကပြောပါတယ်။
ပြီးခဲ့တဲ့ ဖေဖော်ဝါရီလ ကုန်ပိုင်းကလည်း မန္တလေးမြို့ ၆၂ လမ်း မှာရှိတဲ့ မြင့်မြင့်ခင် ထိုးမုန့်ဆိုင်က CCTV မှတ်တမ်းတွေကို စစ်ကောင်စီတပ်ဖွဲ့ဝင်တွေ အတင်းအဓမ္မ ဝင်ရောက်ယူဆောင်ခဲ့တာမျိုးလုပ်ခဲ့တာရှိပါတယ်။