မြန်မာနိုင်ငံမှာ လူသားချင်းစာနာမှုအခြေအနေဟာ ဆိုးရွားလာနေပြီး လူဦးရေ ၃ သန်းခန့်ဟာ အသက်ကူညီကယ်ဆယ်ရေးလက်တွေ့လုပ်ဆောင်ဖို့လိုအပ်နေတယ်လို့ ကုလသမဂ္ဂကူညီကယ် ဆယ်ရေးအကြီးအကဲက မနေ့က(နိုဝင်ဘာ ၈ ရက်) ပြောပါတယ်။
အကြမ်းဖက်မှုတွေ ရပ်တန့်မှုနဲ့ မြန်မာ့အကြပ်အတည်းကို ငြိမ်းချမ်းစွာဖြေရှင်းမှုမရှိရင် လူဦးရေ ၃ သန်းဆိုတဲ့ကိန်းဂဏန်းထက် ပိုမိုမြင့်တက်လာဖို့သာရှိကြောင်း ကုလသမဂ္ဂကူညီကယ်ဆယ် ရေးအရာရှိချုပ် Martin Griffiths က ပြောပါတယ်။
“ရန်ကုန်၊ မန္တလေးအပါအဝင် မြို့ပြဒေသတွေနဲ့ အနီးအနားတွေမှာ စားနပ်ရိက္ခာမလုံလောက်မှု မြင့်တက်လာနေတယ်ဆိုတဲ့ အစီရင်ခံစာတွေအပေါ် ကျွန်တော် ပိုပြီးစိုးရိမ်နေပါတယ်” လို့ Martin Griffiths က ဆိုပါတယ်။
ပြီးခဲ့တဲ့သီတင်းပတ်တွေအတွင်း နိုင်ငံရဲ့အနောက်မြောက်ဒေသအခြေအနေနဲ့ပတ်သက်လို့ အလွန်အမင်းစိုးရိမ်တယ်လို့ ကုလအကြီးအကဲက မှတ်ချက်ပြုခဲ့ပြီး မကွေးနဲ့စစ်ကိုင်းတိုင်းဒေသတွေက ပြည်သူ့ကာကွယ်ရေးတပ်ဖွဲ့တွေ၊ ချင်းပြည်နယ်က ချင်းပြည်သူ့ကာကွယ်ရေးတပ်ဖွဲ့တွေနဲ့ မြန်မာစစ်တပ်တို့ ထိတွေ့တိုက်ပွဲဖြစ်ပွားမှု ကျယ်ပြန်လာခဲ့ပါတယ်။
Public Service Announcement
“အမျိုးသမီးတွေနဲ့ ကလေးငယ်တွေအပါအဝင် လူပေါင်း ၃၇၀၀၀ ကျော် ထပ်မံနေရပ်စွန့်ခွာရပြီး ဘုရားကျောင်းနဲ့ လူသားချင်းအကူအညီပေးရေးအဖွဲ့ရုံးခန်းတွေအပါအဝင် လူနေအိမ် ၁၆၀ ကျော် မီးလောင်ကျွမ်းခဲ့ပါတယ်”လို့ Mr. Martin က ထန်တလန်မြို့ဖြစ်စဉ်ကို အသေးစိတ်ပြော ပါတယ်။
