-အဆိုပါ တိုက်ပွဲအတွင်း စစ်ကောင်စီဘက်မှ အနည်းဆုံး ၂၀ဦးသေပြီး အများအပြားဒဏ်ရာရဟု CNO ထုတ်ပြန်
ကလေးမြို့အနောက်တောင်ပိုင်း နယ်မြေနေရာတစ်ခုရှိ တပ်ဖွဲ့ဝင် ၂၀ကျော် စခန်းချနေထိုင်သည့် ကလေး PDF တပ်ရင်း(၃)အောက်မှ တပ်ခွဲစခန်းတစ်ခုကို အကြမ်းဖက်စစ်ကောင်စီတပ်များက လက်နက်ကြီးများဖြင့် ပစ်ခတ်သိမ်းပိုက်ရာ အဆိုပါစခန်းရှိ တပ်ဖွဲ့ဝင်၁၀ဦး ဖမ်းဆီးခံရကြောင်း ကလေးPDFက ယနေ့ညပိုင်းတွင် ထုတ်ပြန် သည်။
ဖမ်းဆီးခံရသူများမှာ အမျိုးသမီးရှစ်ဦးနှင့် အမျိုးသားသုံးဦး စုစုပေါင်း ၁၀ဦးဖြစ်ပြီး အများစုမှာ တပ်ရင်း(၃)မှ ဆေးအဖွဲ့ဝင်များဖြစ်ကြောင်း ကလေးPDFက ဆိုသည်။
ယနေ့ ညနေပိုင်းအထိသတင်းအရ ဖမ်းဆီးခံရသူများအနက် အမျိုးသားနှစ်ဦးကို အကြမ်းဖက်စစ်ကောင်စီတပ်သားများက သတ်ဖြတ်လိုက်ကြောင်း သတင်းရရှိသော်လည်း အတည်မပြုနိုင်သေးကြောင်း အသိပေးထားသည်။
Public Service Announcement
ထို့ကြောင့် ယနေ့မွန်းလွဲပိုင်းကစ၍ ကလေးမြို့နယ်အနောက်တောင်ပိုင်း နယ်မြေတဝိုက်တွင် ရှားတော၊ မြို့ကြီးကုန်း၊ မြို့လှစသည့် နေရာအသီးသီးမှ စစ်ကြောင်းများခွဲထွက်လာသည့် အကြမ်းဖက်စစ်ကောင်စီတပ်များနှင့် ကလေးPDF၊ CNDF၊ CDF(KKG)နှင့် ရပ်ရွာ ပ. က.ဖ အဖွဲ့များပါဝင်သည့် ပူးပေါင်းတပ်ဖွဲ့များမှာ ညနေ၆နာရီခွဲအထိ အပြန်အလှန်ပစ်ခတ်ခဲ့ကြပြီး တိုက်ပွဲြပင်းထန်ခဲ့သည်ဟု ဖော်ပြထားသည်။
မြို့လှရပ်ကွက်ဘက်မှ စစ်ကူထွက်လာသည့်စစ်ကြောင်းကို ကလေး PDFက မိုင်းဆွဲပြီး ပစ်ခတ်တိုက်ခိုက်ခဲ့သည့်အပြင် တာဟန်းရပ်ကွက်ရှိ တာဟန်းရဲစခန်းကိုလည်း လက်နက်ကြီး၊ လက်နက်ငယ်များဖြင့် သွားရောက်ပစ်ခတ်တိုက်ခိုက်ခဲ့သည်ဟု ထပ်မံဖော်ပြထားသည်။ အကြမ်းဖက်စစ်ကောင်စီဘက်မှ ထိခိုက်သေဆုံးမှုကို အတည်မပြုနိုင်သေးဟု ဖော်ပြထားသည်။
ထို့အပြင် ယနေ့နံနက် ၉နာရီမှ ညနေ၆နာရီအထိ တနေကုန်မရပ်မနားဖြစ်ပွားသည့် အဆိုပါ တိုက်ပွဲအတွင်း အကြမ်းဖက်စစ်ကောင်စီတပ်ဘက်မှ အနည်းဆုံး ၂၀ဦးသေဆုံးပြီး ဒဏ်ရာရရှိသူ အများအပြားရှိကြောင်း ချင်းအမျိုးသားအဖွဲ့ချုပ်(CNO)က ယနေ့ညပိုင်းတွင် ထုတ်ပြန်သည်။
စစ်ကောင်စီဘက်မှ လက်နက်ကြီးများဖြင့် ပစ်ခတ်သော်လည်း CNDFဘက်မှ မစိုးရိမ်ရ ဒဏ်ရာရရှိသူ တစ်ဦးသာရှိခဲ့သည်ဟု အသိပေးထားသည်။
လက်ရှိအချိန်တွင် အပြန်အလှန်ပစ်ခတ်မှုများ ခေတ္တရပ်နားထားသော်လည်း မိမိတို့ဘက်မှ ပိတ်ဆို့ဝိုင်းရံထားသဖြင့် တိုက်ပွဲများအချိန်မရွေးပြန်လည်ဖြစ်ပွားနိုင်ပြီး ပြည်သူများအနေဖြင့်လည်း အသွားအလာသတိထားကြရန် ထုတ်ပြန်ထားသည်။
