စစ်ကိုင်းတိုင်း၊ ဆားလင်းကြီးမြို့နယ်တွင် ကျောက်စိမ်းများတင်ဆောင်လာသော ယာဥ်အပါအဝင် စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး စစ်ကောင်စီတပ်သားအများအပြားသေဆုံးနိုင်ကြောင်းဒေသခံများကပြောသည်။
ယမန်နေ့ နိုဝင်ဘာလ ၁၆ ရက် မွန်းလွဲ ၁း၁၅ ဝန်းကျင်က ယင်းမာပင်မြို့နယ်ဘက်မှဆားလင်းကြီးမြို့နယ်၊ ညောင်ပင်ကြီးဘက်သို့ဆင်းလာသော စစ်ကားခြောက်စီးထက်မနည်းပါဝင်သည့် စစ်ကောင်စီယာဉ်တန်းအား ပဒေသာမိုင်း၅၀ကျော်ဖြင့် Monywa UG Groupနှင့်Triple Twoအဖွဲ့အပါအဝင်မဟာမိတ်အဖွဲ့များမှ မိုင်းဆွဲတိုက်ခိုက်ခဲ့ကြောင်း ၎င်းတို့ကသတင်းထုတ်ပြန်သည်။အကြမ်းဖက်စစ်ကားလေးစီးပျက်စီးပြီး စစ်ကောင်စီတပ်သားအထိခိုက်အကျဆုံးများသည်ဟု ဖော်ပြထားသည်။
“ကားတွေက ကျောက်စိမ်းတွေတင်လာတဲ့ကားလည်းပါပါတယ်။ အဖွဲ့တွေပေါင်းပြီးတိုက်ကြတာပါ။ သုံးနေရာခွဲပြီး မိုင်းဆွဲခဲ့တာပါ။”ဟု မုံရွာ UG Group အဖွဲ့က တာဝန်ရှိသူက ပြောသည်။
မဟာမိတ်အဖွဲ့ရဲဘော်များ ဘေးကင်းစွာပြန်လည်ဆုတ်ခွာနိုင်ခဲ့ကြောင်း ၎င်းတို့ကအသိပေးသည်။
Public Service Announcement
အဆိုပါတိုက်ခိုက်မှုတွင် နိုဝင်ဘာလ ၉ ရက်နေ့က ညောင်ပင်ကြီးယင်းမာပင်လမ်း ဖိုလ်ဝင်တောင်လမ်းခွဲအနီးတိုက်ပွဲမှ သွေးကြွေးကိုတောင်းယူခဲ့ခြင်းဖြစ်ပြီး စစ်ကောင်စီတပ်သားအများအပြားသေဆုံးနိုင်သည်ဟု ပါဝင်တိုက်ခိုက်ခဲ့သည့် One Star Task Force အဖွဲ့ကလည်း အသိပေးသည်။
