ရွှေ​စျေး ၁၈သိန်းမ​ကျော်​အောင် ထိန်းချုပ်​နေဟုဆို

ရန်ကုန်တိုင်းရွှေလုပ်ငန်းရှင်များအသင်းက ရွှေဈေးကို ၁၈သိန်းထက် မကျော်အောင် ထိန်းချုပ်နေကြောင်း ပြည်တွင်းရွှေလုပ်ငန်းရှင်များက ပြောသည်။

ပြင်ပပေါက်ဈေးတွင် အခေါက်ရွှေတစ်ကျပ်သားကို ၁၈သိန်းကျော်နေချိန်တွင် ရန်ကုန်တိုင်းရွှေလုပ်ငန်းရှင်များအသင်းက စစ်ကောင်စီအလိုကျ ပြည်တွင်းရွှေဈေးကို ၁၈သိန်းထက် မကျော်အောင် ဈေးဖွင့်နေသည်ဟု ပြည်တွင်းရွှေလုပ်ငန်းရှင်များက ပြောသည်။

ထိုအကျိုးဆက်အနေဖြင့် ရွှေမှောင်ခိုရောင်းဝယ်သည့်ဈေးကွက်ပေါ်ပေါက်နေကြောင်း ပြည်တွင်းဈေးကွက်အတွင်းမှ သိရသည်။

“ရန်ကုန်ရွှေအသင်းက အခုလိုထိန်းချုပ်ပေးနေတာကို စစ်ခေါင်းဆောင်တွေက သဘောကျမှာပေါ့။ ဒါပေ့မယ် ဈေးကွက်မှ အများကြီး ထိခိုက်နစ်နာရတယ်”ဟု ​ရွှေလုပ်ငန်းရှင်တစ်ဦးက ပြောသည်။

Public Service Announcement

ရန်ကုန်မြို့လယ် ရွှေဘုံသာလမ်းရှိ ရွှေအရောင်းအဝယ်လုပ်နေသည့် ဈေးကွက်မှတစ်ဆင့် ရွှေဈေးကို ထိန်းချုပ်ကန့်သတ်ဖို့ လုပ်ဆောင်နေခြင်းဖြစ်ပြီး ပြင်ပဈေးကွက်တွင် အမှန်တကယ် လက်တွေ့ကျသည်ဈေးနှုန်းဖြစ်မလာဟု ၎င်းကဆိုသည်။

“စစ်ဗိုလ်တွေက သူတို့လက်ထက်မှာ ရွှေဈေးကို တက်လာတာမလိုချင်ဘူး။ အရင်အစိုးရလက်ထက်မှာ ရွှေဈေးဘယ်၊ သူတို့လက်ထက်မှာ ဘယ်လောက်ရှိတယ်ဆိုတာမျိုး နှိုင်းယှဉ်တာကို စစ်တပ်ကမကြိုက်ဘူး။ ဒါကြောင့် မရရအောင် လိုက်ကန့်သတ်နေတာ”ဟု ရွှေဆိုင်ပိုင်ရှင်တစ်ဦးက ပြောသည်။

နိုဝင်ဘာ ၁၇ ရက်က ပြင်ပပေါက်ဈေးတွင် အခေါက်ရွှေတစ်ကျပ်သားကို ၁၈၀၅၀၀၀ကျပ် ပေါက်ဈေးရှိသော် လည်း ရန်ကုန်တိုင်းရွှေလုပ်ငန်းရှင်များအသင်းက ၁၇၉၇၅၀၀ကျပ် ဈေးဖွင့်ခဲ့သည်။