စစ်​ကောင်စီတပ်မီးရှို့သည်ကို ငြှိမ်းသတ်ရန်ကြိုးစား​​​သော ၁၅နှစ်အရွယ်က​လေးငယ်​သေနတ်ဖြင့်ပစ်သတ်ခံရ

စစ်ကိုင်းတိုင်း၊ ရေဦးမြို့နယ်၊ တင်းတိမ်ရံကျေးရွာတွင် အကြမ်းဖက်စစ်ကောင်စီ၏ မီးရှို့မှုကြောင့် အိမ်တစ်အိမ်မီးလောင်နေစဥ် လာရောက်ငြှိမ်းသတ်ပေးသည့်အသက်၁၅ နှစ်အရွယ် ကလေးငယ်တစ်ဦးအား စစ်ကောင်စီက ​သေနတ်ဖြင့်ပစ်သတ်ခဲ့ကြောင်း ဒေသခံများက ပြောသည်။

ယမန်နေ့( နိုဝင်ဘာလ ၁၆ ရက်)က ရေဦးမြို့နယ် တင်းတိမ်ရံကျေးရွာသို့ စစ်ကောင်စီ တပ်များ လက်နက်ကြီးများဖြင့်ပစ်ခတ်ခြင်း၊ ရွာအဝင်အစွန်အိမ်များကို မီးရှို့ခြင်းများ ပြုလုပ်ခဲ့ကြကြောင်း၊ ညနေ ( ၄ ) နာရီကျော်၌ တင်းတိမ်ရံကျေးရွာ သဲကုန်းကြီးဘုန်းကြီးကျောင်းမြောက်ဖက် နေအိမ်တအိမ်အား စစ်ကောင်စီတပ်များ မီးရှို့ခဲ့ပြီး အဆိုပါအိမ်အား မီးငြိမ်းသတ်ရန် ဘုန်းကြီးကျောင်းတွင်နေထိုင်နေသူ အသက် ၁၅ နှစ်အရွယ် မောင်ရှိုင်းထက်ဇော်သည် မော်တာဖွင့် ရေပိုက်ကိုင်ကာ ပြေးထွက်လာပြီး မီးငြှိမ်းသတ်မည်ပြုစဉ် သေနတ်ပစ်ခံရပြီး လဲကျသွားကြောင်း ဒေသခံများက ပြောသည်။

“ကလေးက အပစ်ခံရပြီး ကယ်ပါကယ်ပါအော်နေတာ။ ဘယ်သူမှသွားမခေါ်ရဲဘူး။”ဟုဒေသခံတစ်ဦးက ပြောသည်။

စစ်ကောင်စီတပ်များက ၎င်း၏ အနီးအနားတွင်ရှိနေသည့်အတွက် မည်သူမှအလောင်းမကောက်ရဲကြဘဲ အပစ်ခံရပြီး ငါးနာရီနီးပါးအကြာ ည ( ၈.၄၀ ) နာရီမှသာ လူနာကောက်နိုင်ခဲ့ကြောင်း၊ ပေါင်တွင်ကျည်ထိမှန်ခဲ့ပြီး ညတွင်းချင်းဆေးရုံပို့ရန်မလွယ်သည့်အတွက် နံနက်လင်းမှဆေးရုံပို့ရန်စီစဥ်ထားသော်လည်း ယနေ့နံနက်ပိုင်းတွင် သေဆုံးသွားခဲ့ကြောင်း ဒေသခံများက ပြောသည်။

Public Service Announcement

ကွယ်လွန်သူ မောင်ရှိုင်းထက်ဇော်မှာ ရေဦးမြို့နယ် ကွမ်းအုံအုပ်စု မကျီးကုန်းရွာ ဇာတိဖြစ်ပြီး အလောင်းကို မကျီးကုန်းရွာသို့ သယ်ယူရန်ပင် တပ်များရှိနေ၍ သယ်ယူနိုင်ခြင်းမရှိသေးကြောင်း ဒေသခံများက ပြောသည်။