အကြမ်းဖက်စစ်ကောင်စီတပ်က ကလေးမြို့နယ်တွင် ပြည်သူများ၏နေအိမ်များကို မီးရှို့ခဲ့သောကြောင့် နေအိမ်ဆယ်လုံး ပျက်စီးဆုံးရှုံးခဲ့ရပြီး၊ စစ်ရာဇဝတ်မှုကျူးလွန်မှုမှတ်တမ်းများကို သက်သေယူထားကြရန်ဒေသခံပြည်သူများကို တိုင်းဒေသကြီးလွှတ်တော်ကိုယ်စားလှယ်က တိုက်တွန်းသည်။
စစ်ကိုင်းတိုင်းဒေသကြီးကလေးမြို့တွင်ယမန်နေ့ (နိုဝင်ဘာလ၁၈ရက်)တိုက်ပွဲအတွင်း အကြမ်းဖက်စစ်ကောင်စီတပ်ဖွဲ့ဝင်များကို ကလေးPDF က မိုင်းဆွဲတိုက်ခိုက်သဖြင့် စစ်ကောင်စီတပ်မှ ဗိုလ်ကြီးတစ်ဦးအပါအဝင် ၁၅ ဦးသေဆုံးခဲ့ပြီးနောက် စစ်ကောင်စီတပ်က ချင်းဆိုင်ရွာမှဒေသခံပြည်သူများ၏နေအိမ်များကို မီးရှို့ဖျက်ဆီးခဲ့ခြင်းဖြစ်သည်။
” အကြမ်းဖက်စကစဟာ ချင်းဆိုင်ရွာက အိမ် ၁၀ လုံးကိုမီးရှို့ခဲ့ပါတယ်။စစ်ရာဇဝတ်မှုကျူးလွန်မှုမှတ်တမ်းတွေအဖြစ် ပြည်သူများ သက်သေရယူထားကြပါ” ဟု
စစ်ကိုင်းတိုင်းဒေသကြီး လွှတ်တော်ကိုယ်စားလှယ်ဒေါ်သန့်ဝေကျော်က လူမှုကွန်ရက်မှတစ်ဆင့် တိုက်တွန်းထားသည်။ ဒေါ်သန့်ဝေကျော်သည် အမျိုးသားဒီမိုကရေစီအဖွဲ့ချုပ်ပါတီကိုယ်စားပြုကာ ၂၀၂၀ ရွေးကောက်ပွဲအနိုင်ရထားသူဖြစ်သည်။
ကလေးမြို့နယ်PDF တပ်ရင်း( ၃) တပ်ခွဲ (၃) မှ အမျိုးသမီးသူနာပြု ၁၀ ဦးအပါအဝင် တပ်ဖွဲ့ဝင်၁၂ဦးကို စစ်ကောင်စီက ဖမ်းဆီးထားပြီးနောက် ဖမ်းဆီးထားသူများကိုကယ်တင်နိုင်ရန် ကလေးPDF ကအရှိန်မြှင့်တိုက်ခိုက်နေကာ ၊တိုက်ပွဲများ ပြင်းထန်နေသည်။နိုဝင်ဘာ ၁၈ရက်တွင် အကူလာသည့်စစ်ကောင်စီတပ်ယာဥ်တန်းအား ချင်းဆိုင်ရွာနှင့်ဇင်းကလင်းရွာကြားတွင် ကလေးPDFက မိုင်းခွဲတိုက်ခိုက်ခဲ့ရာ စစ်တပ်ဘက်က ဗိုလ်တစ်ဦးအပါအဝင် ၁၅ ဦးခန့် သေဆုံးခဲ့သည်။ကလေးPDFမှဖမ်းဆီးခံထားရသူ ၁၂ဦးအနက် အမျိုးသား နှစ်ဦးနှင့် အမျိုးသမီးတစ်ဦးကို စစ်ကောင်စီတပ်ကနှိပ်စက်သတ်ဖြတ်ခဲ့သော ရုပ်အလောင်းကို တွေ့ရှိရကြောင်း Kalay PDFကယမန်နေ့ကထုတ်ပြန်သည်။
ထို့အပြင်ဖမ်းဆီးခံထားရသူ အမျိုးသမီးသူနာပြု ၉ ဦးကို စစ်ကောင်စီတပ်က လူသားဒိုင်းအဖြစ်အသုံးပြုနေသဖြင့် ၎င်းတို့ထိ့ခိုက်မှုမဖြစ်စေရန် နေရာအချို့တွင် ပြည်သူ့ကာကွယ်ရေးတပ်ဖွဲ့ဝင်များက နောက်ဆုတ်ပေးထားသည်။သို့သော် အချိန်မရွေးတိုက်ပွဲများပြင်းထန်စွာဖြစ်ပွားနိုင်သောအခြေအနေဖြစ်သည်။
အလားတူ ကလေးမြို့အပြင် ဒေသချင်းထိစပ်နေသော ယောဒေသ(ဂန့်ဂေါ်မြို့နယ်)တွင် တိုက်ပွဲများ ဆက်လက်ပြင်းထန်နေ၍ လတ်တလောတွင် ဒေသတွင်း ခရီးသွားလာခြင်းမပြုလုပ်ကြရန် ယောနှင့် ကလေး ဒေသ ပြည်သူ့ကာကွယ်ရေးအဖွဲ့များက ပြည်သူလူထုအား ယနေ့ထုတ်ပြန်သတိ့ပေးထားသည်။